ডিজিটেল ডেস্কঃ পুনৰ প্ৰেক্ষাপটত উদীয়মান ক্ৰিকেটাৰ কে এল ৰাহুল৷ বুধবাৰে চেঞ্চুৰিয়ানত অনুষ্ঠিত ভাৰত বনাম দক্ষিণ আফ্ৰিকাৰ প্ৰথমখন টেষ্টত শতক স্ক’ৰ কৰি বুধবাৰে ভাৰতীয় তাৰকা কে এল ৰাহুলে ইতিহাসৰ সৃষ্টি কৰে। প্ৰটিয়াছৰ দ্বাৰা প্ৰথমে বেটিং কৰিবলৈ দিয়াৰ পাছত তেওঁ ১০১ ৰাণৰ ভয়ংকৰ ইনিংছ খেলে। নতুন ৰূপত অৱতীৰ্ণ হৈ ৰাহুলে এক ঐতিহাসিক কৃতিত্ব অৰ্জন কৰিছে।
ৰাহুলৰ এই ১০১ ৰাণ চলিত টেষ্ট ছিৰিজৰ মুখ্য চৰ্চা হ’ব আৰু ভাৰতৰ প্ৰাক্তন প্ৰশিক্ষক ৰবি শাস্ত্ৰীয়ে কয় যে এয়া কে এলৰ শ্ৰেষ্ঠ শতক। চেঞ্চুৰিয়ানৰ ছুপাৰস্প’ৰ্ট পাৰ্কত শচীন টেণ্ডুলকাৰ আৰু ৰিকি পণ্টিঙৰ দৰে খেলুৱৈয়েও যিখিনি অৰ্জন কৰিব পৰা নাই, সেইখিনি এতিয়া তাৰকা উইকেট কীপাৰগৰাকীয়ে লাভ কৰিছে।
চেঞ্চুৰিয়ানত একাধিক টেষ্ট শতক অৰ্জন কৰা প্ৰথমজন বহিঃৰাষ্ট্ৰৰ বেটছমেন হিচাপে পৰিগণিত হৈছে ৰাহুল। ২০২১ চনত চেঞ্চুৰিয়ানলৈ যোৱা অন্তিমবাৰৰ বাবে শতক লাভ কৰাৰ পাছত এইটোৱেই আছিল ৰাহুলৰ দ্বিতীয়টো টেষ্ট টন। আনকি শচীন টেণ্ডুলকাৰ, ৰিকি পণ্টিং, ছাৰ ভিভ ৰিচাৰ্ডছ, এডাম গিলক্ৰিষ্ট আৰু বীৰেন্দ্ৰ ছেহৱাগৰ দৰে খেলুৱৈয়েও এই স্থানত একাধিক টেষ্ট টন লাভ কৰা নাই।
আনহাতে বক্সিং ডে’ টেষ্টত শচীন টেণ্ডুলকাৰ আৰু অজিংক্য ৰাহানেৰ পাছত দুটা শতক অৰ্জন কৰা মাত্ৰ তৃতীয়জন ভাৰতীয় হিচাপে পৰিগণিত হৈছে ৰাহুল। বেক টু বেক বক্সিং ডে’ টনৰে শচীনৰ পাছত কে এল দ্বিতীয়জন ভাৰতীয় কাৰণ ইয়াৰ পূৰ্বে কেৱল শচীনেহে এই অভিলেখ গঢ়িছিল।শচীনে ১৯৯৮ আৰু ১৯৯৯ চনত বক্সিং ডে’ৰ শতক অৰ্জন কৰাৰ বিপৰীতে ২০১৪ আৰু ২০২০ চনত ৰাহানেই শতক অৰ্জন কৰিছিল।
Continue Reading
