শ্ৰীকৃষ্ণ মন্দিৰক লৈ হঠাৎ কিয় ব্যস্ত হৈ পৰিল হেমা মালিনী ?

ডিজিটেল ডেস্ক: নিৰ্বাচনৰ পূৰ্বে মন্দিৰ নিৰ্মাণ তথা মুকলি কৰাৰ এক অঘোষিত প্ৰতিযোগিতাত নামি পৰিছে বিজেপি৷ উত্তৰ-প্ৰদেশৰ বিধানসভা নিৰ্বাচনৰ দিন চমু চাপি অহাৰ লগে লগে মন্দিৰ নিৰ্মাণতো গুৰুত্ব দিছে বিজেপিয়ে৷ হিন্দু সংখ্যাগৰিষ্ঠ ৰাজ্যখনৰ ভোটাৰক আকৰ্ষণৰ এক পৰিপন্থী হিচাপে মন্দিৰৰ নিৰ্মাণকাৰ্যত চকু ৰাখিছে শাসকীয় দলটোৱে৷ বিজেপি চৰকাৰ পুনঃপ্ৰতিষ্ঠাৰ চেষ্টাত পাছ পৰি ৰোৱা নাই বিজেপিৰ নেতা-পালিনেতাও৷ বলীউডত খলকনি তোলা একালৰ জনপ্ৰিয় অভিনেত্ৰী তথা বিজেপিৰ সাংসদ হেমা মালিনীয়ে নিজ সমষ্টিত আৰম্ভ কৰিছে নিৰ্বাচনী কুচকাৱাজ৷

অলপতে প্ৰধানমন্ত্ৰীয়ে কাশী-বিশ্বনাথ প্ৰকল্প মুকলি কৰাৰ পাছতে হেমা মালিনীয়ে নিজ সমষ্টি মথুৰাতো ৰাখিছে এলানি কাৰ্যসূচী৷ ইন্দোৰত আজি সংবাদ মাধ্যমৰ আগত সাংসদগৰাকীয়ে কয় যে, “কাশী-বিশ্বনাথ ক’ৰিডৰ আৰু ৰাম জন্মভূমিৰ সমানে মথুৰাও গুৰুত্বপূৰ্ণ৷” তেওঁ লগতে কয় যে, শ্ৰীকৃষ্ণৰ জন্মভূমি মথুৰা প্ৰেম আৰু আকৰ্ষণৰ প্ৰতীক৷ মই এই স্থানত এটা মন্দিৰ হোৱাটো বিচাৰো৷ ইতিমধ্যে সেই স্থানত এটা মন্দিৰ আছে যদিও সেই মন্দিৰ কাশী-বিশ্বনাথ প্ৰকল্পৰ দৰে সুন্দৰকৈ নিৰ্মাণ কৰিবলৈ মোদী ডাঙৰীয়াক আহ্বান জনাইছো৷”

৩৩৯ কোটিটকীয়া প্ৰকল্পৰে পুনঃনিৰ্মাণ কৰিছে কাশী-বিশ্বনাথ প্ৰকল্প৷ বিগত ১৩ ডিচেম্বৰত প্ৰথমটো পৰ্যায় মুকলি কৰিছে প্ৰধানমন্ত্ৰী মোদীয়ে৷ ৰাজ্যখনত অহা বৰ্ষৰ ফেব্ৰুৱাৰী মাহত অনুষ্ঠিত হ’ব বিধানসভা নিৰ্বাচন।