ডিজিটেল ডেস্ক: অৰ্থনৈতিক সংকটে জুৰুলা কৰা শ্ৰীলংকাত এতিয়া বুভুক্ষু জনতাৰ ক্ষোভৰ উদগীৰণ। ভয়াৱহ অৰ্থনৈতিক মন্দাৱস্থাৰ প্ৰতিকাৰ বিচাৰি দেশখনৰ জনতা পুনৰ নামি পৰিছে ৰাজপথত। দেশখনৰ এই সংকটাপন্ন অৱস্থাৰ সৈতে মোকাবিলা কৰাত সম্পূৰ্ণৰূপে ব্যৰ্থ হোৱা শাসকপক্ষৰ বিৰুদ্ধে জনসাধাৰণৰ পুঞ্জীভূত ক্ষোভৰ স্পষ্টৰূপত বহিৰ্প্ৰকাশ ঘটিছে। দেশৰ বিভিন্ন প্ৰান্তৰ পৰা ৰাজধানী চহৰ কলম্বোত সমবেত হোৱা হাজাৰ হাজাৰ ক্ষোভিত জনতাই শনিবাৰে আৰক্ষীৰ বাধা নেওচি ৰাষ্ট্ৰপতিৰ চৰকাৰী বাসভৱন দখল কৰিছিল।
ইতিপূৰ্বে চোৰাংচোৱাৰ দ্বাৰা শনিবাৰৰ এই গণ আন্দোলনৰ তথ্য লাভৰ পাছতে শুকুৰবাৰে নিশাই নিজা বাসভৱন এৰি সেনাৰ মুখ্য কাৰ্যালয়লৈ পলায়ন কৰিছিল ৰাষ্ট্ৰপতি গোটাবায়া ৰাজপাক্ষেই। প্ৰকাশিত খবৰ অনুসৰি জনতাৰ এই ৰুদ্ৰমূৰ্ত্তি দেখি আতংকিত হৈ পৰা ৰাজপাক্ষেই দেশ এৰি পলায়ন কৰিছে। আনহাতে প্ৰধানমন্ত্ৰী ৰণিল বিক্ৰমসিংহেও প্ৰতিবাদৰ ওচৰত হাৰ মানি পদত্যাগ কৰিছে।
শ্ৰীলংকাত জনসাধাৰণৰ এই প্ৰতিবাদ তীব্ৰতৰ হোৱাৰ সময়তে ভাৰতে অতিৰিক্ত হোভাৰক্ৰাফ্ট আৰু পেট্ৰ'ল নাও মোতায়েন কৰি শ্ৰীলংকাৰ জলসীমাত নিৰীক্ষণ বৃদ্ধি কৰিছে। অবৈধ অনুপ্ৰৱেশকাৰী বা ভাৰত বিৰোধী শক্তিৰ অনুপ্ৰৱেশ প্ৰতিহত কৰিবলৈয়ে এইদৰে নিৰীক্ষণ বৃদ্ধি কৰা হৈছে বুলি এগৰাকী জ্যেষ্ঠ কেন্দ্ৰীয় বিষয়াই জানিবলৈ দিছে।
ডৰ্ণিয়াৰ নামৰ বিমানখনেও শ্ৰীলংকাৰ সৈতে সংলগ্ন হৈ থকা পালক ষ্ট্ৰেইট এলেকাত হঠাতে শত্ৰুৰ স্থিতিৰ বিৰুদ্ধে প্ৰতিৰক্ষামূলক নিৰীক্ষণৰ বাবে অধিক হাৰত যুদ্ধ বিমান পৰিচালনা কৰি আছে।
চুবুৰীয়া দ্বীপৰাষ্ট্ৰখনত ক্ৰমাগতভাৱে বৃদ্ধি পোৱা এনে পৰিস্থিতিৰ প্ৰতি লক্ষ্য ৰাখি উপকূলীয় আৰক্ষীকো উচ্চ সতৰ্কতা অৱলম্বন কৰিবলৈ কোৱা হৈছে। তদুপৰি অন্য চোৰাংচোৱা সংস্থাসমূহকো এই বিষয়ত দৃষ্টি নিবদ্ধ কৰিবলৈ নিৰ্দেশ প্ৰদান কৰা হৈছে।
ৰামেশ্বৰমৰ ওচৰৰ মান্দাপাম অঞ্চলৰ উপকূলৰক্ষী বাহিনীয়ে এই নিৰীক্ষণ অভিযানত গুৰুত্বপূৰ্ণ ভূমিকা পালন কৰি আছে, কিয়নো এই বাহিনীয় সাগৰৰ গভীৰ জলভূমি আৰু অগভীৰ পানীতো তীব্ৰ গতিত ভ্ৰমণ কৰিব পাৰে।
Continue Reading
