শ্ৰীনগৰত অব্যাহত সন্ত্ৰাসবাদী কাৰ্য-কলাপ: এনকাউণ্টাৰত নিহত সাংবাদিকৰূপী উগ্ৰপন্থী

ডিজিটেল ডেস্ক: জম্মু আৰু কাশ্মীৰৰ শ্ৰীনগৰত আৰক্ষীৰ এনকাউণ্টাৰত নিহত হৈছে দুজনকৈ সাংবাদিকৰূপী উগ্ৰপন্থী৷ আজি পুৱতিনিশা শ্ৰীনগৰৰ ৰাইনাৱাৰী কোৱাৰ্টাৰত সংঘটিত আৰক্ষী-উগ্ৰপন্থীৰ সংঘৰ্ষত নিৰাপত্তাৰক্ষীয়ে দুজনকৈ উগ্ৰপন্থীক গুলীয়াই হত্যা কৰিছে। আৰক্ষীৰ ভাষ্য অনুসৰি, মৃত দুজনৰ এজন ৰায়ছ আহমেদ ভাটে এগৰাকী সাংবাদিক হিচাপে কৰ্মৰত আছিল৷ যিয়ে বিগত বৰ্ষৰ আগষ্টত লস্কৰ-ই-তৈবা (এলইটি)ত যোগদান কৰিছিল। আৰক্ষী মহাপৰিদৰ্শক(কাশ্মীৰ ৰেঞ্জ) বিজয় কুমাৰে কৈছিল যে দক্ষিণ অনন্তনাগ জিলাৰ বিজবেহাৰাৰ শ্বাহাবাদ বীৰীৰ বাসিন্দা নিহত ভাটে আগতে এটা বাতৰি পৰ্টেল ‘ভেলী নিউজ ছাৰ্ভিচ’ পৰিচালনা কৰিছিল। তেওঁৰ সৈতে পোৱা পৰিচয়-পত্ৰখনত তেওঁক প’ৰ্টেলটোৰ মুখ্য সম্পাদক আছিল বুলি জানিব পৰা গৈছে৷ পৰৱৰ্তী সময়ত উগ্ৰপন্থী গোটত যোগদান কৰি তেওঁ এজন ‘চি’ শ্ৰেণীৰ সন্ত্ৰাসবাদী হিচাপে সন্ত্ৰাসবাদ অব্যাহত ৰাখিছিল৷ আৰু সন্ত্ৰাসবাদী অপৰাধ সংঘটিত কৰাৰ বাবে অনন্তনাগ আৰক্ষী থানাত তেওঁৰ বিৰুদ্ধে ৰুজু হৈছিল দুটা গোচৰ৷ আৰক্ষীয়ে নিহত ‘চি’ শ্ৰেণীৰ আনজন উগ্ৰপন্থীক বিজবেহাৰাৰ বাসিন্দা হিলাল আহমেদ ৰহ বুলি চিনাক্ত কৰে। এইটোৱে কৈছিল যে তেৱোঁ বিগত বৰ্ষৰ আগষ্টত এলইটিত যোগদান কৰিবলৈ নিৰুদ্দেশ হৈছিল।