ডিজিটেল ডেস্ক: অন্ত পৰা নাই ধোঁৱা আৰু বাৰুদৰ কাহিনী৷ বছৰ বাগৰিবলৈ ছদিন৷ এতিয়াও যুদ্ধ উন্মাদনাত বিধ্বস্ত-বিপৰ্যস্ত ইজৰাইল-পেলেষ্টাইন৷ শেহতীয়াকৈ মধ্য গাজাৰ এটা শৰণাৰ্থী শিবিৰত ইজৰাইলৰ বিমান আক্ৰমণত কমেও ৭০ জন লোক নিহত হৈছে বুলি দেওবাৰে হামাছ পৰিচালিত গাজাৰ স্বাস্থ্য মন্ত্ৰণালয়ে সদৰী কৰে৷
সংবাদ সংস্থা এএফপিৰ বাতৰি অনুসৰি, পেলেষ্টাইনী স্বাস্থ্য মন্ত্ৰণালয়ৰ মুখপাত্ৰ আশ্ৰাফ আল-কিদ্ৰাৰ মতে, এই আক্ৰমণত আল-মাগাজী শিবিৰৰ ঘৰসমূহ ধ্বংস হৈ যায়। শিবিৰত বাস কৰা বৃহৎ সংখ্যক পৰিয়ালৰ বাবে মৃত্যুৰ সংখ্যা বৃদ্ধি হোৱাৰ সম্ভাৱনা আছে আৰু ঘটনাটোক তেওঁ ‘গণহত্যা’ আখ্যা দিয়ে৷
সংবাদ সংস্থা ৰয়টাৰ্ছে আল-কিদ্ৰাৰ উদ্ধৃতি দি কয়, মাগাজী শিবিৰত যি ঘটিছে সেয়া হৈছে এক গণহত্যা৷
হামাছে এটা বিবৃতিও জাৰি কৰিছিল আৰু ঘটনাটোক ভয়ংকৰ গণহত্যা বুলি অভিহিত কৰিছিল আৰু কৈছিল যে এইটো এটা নতুন যুদ্ধ অপৰাধ।
আৱাসী আৰু পেলেষ্টাইনী সংবাদ মাধ্যমে কৈছিল যে ইজৰাইলে ৰাতিটোৰ ভিতৰতে উত্তৰ গাজা ষ্ট্ৰিপৰ জাবালিয়া অঞ্চলত বোমা বিস্ফোৰণ সংঘটিত কৰিছিল।
গাজাৰ স্বাস্থ্য মন্ত্ৰণালয়ৰ এজন মুখপাত্ৰই দেওবাৰে কৈছিল যে যোৱা ২৪ ঘণ্টাত ১৬৬ জন পেলেষ্টাইনী নিহত হৈছে, যাৰ ফলত মুঠ পেলেষ্টাইনী লোকৰ মৃত্যুৰ সংখ্যা ২০,৪২৪জনলৈ বৃদ্ধি পাইছে।
