ডিজিটেল ডেস্ক: এইবাৰ বনানীকৰণৰ লক্ষ্য লৈছে আদানী গ্ৰুপে৷ ২০৩০ৰ ভিতৰত এক ট্ৰিলিয়ন গছপুলি ৰোপণ কৰাৰ বিশ্ব অৰ্থনৈতিক মঞ্চৰ লক্ষ্যৰ অংশ হিচাপে আদানি গ্ৰুপে ইতিমধ্যে ২৯ নিযুত গছ ৰোপণ কৰিছে বুলি গোটটোৰ অধ্যক্ষ গৌতম আদানীয়ে সদৰী কৰে।
তেওঁলোকৰ লক্ষ্য হৈছে এই দশকৰ শেষৰ ফালে ১০০ নিযুত গছ ৰোপণ কৰা, যাতে এই অভিযানত অৰিহণা যোগোৱা যায়। ইয়াৰ ভিতৰত আদানী গ্ৰুপে ভাৰতৰ উপকূলত ৩৭ নিযুত মেংগ্ৰোভ গছ আৰু ৬৩ নিযুত ‘ইনলেণ্ড ট্ৰী’ ৰোপণ কৰাৰ লক্ষ্য স্থিৰ কৰিছে৷
আনহাতে, আদানি গ্ৰুপে ২০২৮ৰ ভিতৰত গ্ৰুপটোৰ চিমেণ্ট উৎপাদনৰ ৬০% নৱীকৰণযোগ্য শক্তিৰ উৎসৰ সৈতে শক্তি প্ৰদান কৰিবলৈ প্ৰতিশ্ৰুতিবদ্ধ বুলিও আদানীয়ে সদৰী কৰে। তেওঁ লগতে কয়, এই উচ্চাভিলাষী লক্ষ্যই আমাক বহনক্ষম চিমেণ্ট উৎপাদনৰ বিশ্বব্যাপী ক্ষেত্ৰত অগ্ৰণী হিচাপে প্ৰতিষ্ঠা কৰিব। গোটটোৰ বিদ্যুৎ বিতৰণ শাখা আদানী ইলেকট্ৰিচিটিয়ে ২০২৭ চনৰ ভিতৰত মুম্বাইক ৬০% নৱীকৰণযোগ্য বিদ্যুৎ প্ৰদান কৰাৰ পথত আছে৷
Continue Reading
