ডিজিটেল ডেস্কঃ এখন প্ৰাইভেট জেট বিমানত ফুৰিবলৈ গৈছিল তুৰ্কীৰ এগৰাকী জনপ্ৰিয় ইনষ্টাগ্ৰাম ইনফ্লুৱেন্সাৰ বুৰ্কু চাগলাম। কিন্তু দুৰ্ভাগ্যজনকভাৱে বিমানখন অগ্নিদগ্ধ হৈ মাটিত ভাঙি পৰে। মৃত্যু হয় বুৰ্কুৰ।
কিন্তু মৃত্যুৰ ঠিক আগমুহূৰ্তত বুৰ্কুৱে যি কৰি গ’ল, সি সকলোৰে বুকু কঁপাই তুলিছে। মৃত্যুৰ আগে আগে নিজৰ অন্তিম মুহূৰ্তৰ ফটো তুলি ইনষ্টাগ্ৰামযোগে শ্বেয়াৰ কৰি গ’ল তেওঁ।
মাত্ৰ ২২ বছৰ বয়সতে বুৰ্কুৰ মৃত্যু হয়। ১ ডিচেম্বৰ বৃহস্পতিবাৰে বুৰ্কুৱে এগৰাকী বিমানচালকৰ তুৰ্কীৰ চাকাৰীয়া প্ৰদেশৰ পামুকোভা নামৰ ঠাইকনৰ পৰা আবেলি বিমানযাত্ৰা কৰে। কিন্তু যাত্ৰাৰ প্ৰায় ২০ মিনিট পাছতে বিমানখনৰ যান্ত্ৰিক বিজুটি ঘটিব ধৰে।
নিয়ন্ত্ৰণ হেৰুৱাই বুৰ্চা নামৰ প্ৰদেশখনত অগ্নিদগ্ধ হয় বিমানখন। মৃত্যু হয় বুৰ্কু আৰু বিমানচালকগৰাকীৰ।
ঘটনাৰ ঠিক আগে আগে বুৰ্কুৱে এটা ভিডিঅ’ ইনষ্টাগ্ৰামযোগে শ্বেয়াৰ কৰে। তাত লিখে- “মই ইনষ্টাগ্ৰামৰ পৰা চিৰবিদায় লৈছো।”
তাৰপাছতে বুৰ্কুৰ অনুৰাগীসকলৰ মাজত শোকৰ ছাঁ পৰে। আৰক্ষীয়ে জনোৱামতে, মৃত্যু নিশ্চিত বুলি জানিয়েই বুৰ্কুৱে এই ভিডিঅ’ শ্বেয়াৰ কৰিছিল।
দুৰ্ঘটনাৰ তদন্তকাৰীসকলে জনোৱা মতে, মাটিৰ পৰা প্ৰায় ১২০০ মিটাৰ উচ্চতাত বিমানখনৰ স’তে কণ্ট্ৰ’ল ৰুমৰ যোগাযোগ বিচ্ছিন্ন হৈ পৰিছিল। পাছত বিমানখনৰ ধ্বংসাৱশেষ আৰু বুৰ্কু-বিমানচালকৰ মৃতদেহ দুটা উদ্ধাৰ কৰা হয়।
