সিন্দে, ফাড়নবিছ আৰু থাকৰেৰ ভিতৰত কোন বেছি ধনী? কিমান টকাৰ মালিক এসময়ৰ অটো চালক একনাথ সিন্দে?

এয়া প্ৰায় ১৯৮০ ৰ দশকৰ কথা। সেই সময়ত মহাৰাষ্ট্ৰ  চাটাৰাৰ পৰা প্ৰায় ৮৫ কিলোমিটাৰ দূৰৈত কয়না নদীৰ ওচৰৰ দাৰে তাম্বা নামৰ এখন গাঁৱত বাস কৰিছিল এটা  মাৰাঠী পৰিয়ালে। সম্ভাজী সিন্দে এই পৰিয়ালটোৰ মুৰব্বী আছিল। পৰিয়ালটোত এগৰাকী কন্যা সন্তান সুনীতাৰ লগতে তিনিজন পুত্ৰ ক্ৰমে একনাথ, সুভাষ আৰু প্ৰকাশ আছিল। 

সেই সময়ত, কোঙ্কন আৰু দক্ষিণ মহাৰাষ্ট্ৰৰ বেছিভাগ গাঁৱৰ যুৱক-যুৱতীয়ে জীৱিকাৰ সন্ধানত থানে আৰু মুম্বাইলৈ আহিছিল। কামৰ সন্ধানত সম্ভাজী সিন্দেও থানেলৈ গুচি গৈছিল। সেই সময়ত, তিনিওটা শিশুৱে বিদ্যালয়ত পঢ়ি আছিল। থানে আহি তেওঁ এটা বাকচ নিৰ্মাণ কাৰখানাত চুপাৰভাইজাৰ হিচাপে কাম কৰিবলৈ আৰম্ভ কৰিছিল। তিনিওটা ল'ৰা-ছোৱালীয়ে পিছতে দেউতাকৰ কামত সহায় কৰি দিবলৈ আৰম্ভ কৰিছিল৷ তথাপিও যেন তেওঁলোকৰ দুখ মোচন হোৱা নাছিল৷ কিন্তু ভাগ্যৰ চকৰী সদায় একে দিশত নুঘূৰে৷ 

একনাথ সিন্দেৰো ভাগ্যৰ চকৰী লাহে লাহে শুভ দিশত ঘূৰিবলৈ আৰম্ভ কৰিছিল৷ নিজৰ লগতে পৰিয়ালটোক সকাহ দিবলৈ একনাথে অটো চলাবলৈ আৰম্ভ কৰিছিল৷ সেই অটোৰ শেষ ষ্টেছনৰ নাম যেন আছিল ’সাফল্য’৷ ভাগ্যই একনাথ সিন্দেক অটোৰ ষ্টিয়েৰিঙৰ পৰা মহাৰাষ্ট্ৰৰ ৰাজনীতিৰ মূলসুঁতিলৈ লৈ আহিল৷ 

সেয়া এক বেলেগ অধ্যায়৷ যিকিনহওঁক মহাৰাষ্ট্ৰৰ  বৰ্তমানৰ আৰু প্ৰাক্তন মুখ্যমন্ত্ৰীৰ তিনিগৰাকীৰ ভিতৰত  আটাইতকৈ ধনী কোন বাৰু? এক কথাত ক’বলৈ গ’লে প্ৰাক্তন মুখ্যমন্ত্ৰী উদ্ধৱ থাকৰে এই তালিকাৰ শীৰ্ষত আছে। অৱশ্যে, দেৱেন্দ্ৰ ফাড়নবিছ আৰু বৰ্তমানৰ মুখ্যমন্ত্ৰী একনাথ সিন্দেও সম্পত্তিৰ ক্ষেত্ৰত পিছ পৰি থকা নাই।

বিদ্ৰোহৰ পৰা 'বাদশ্বাহ'লৈকে মহাৰাষ্ট্ৰৰ নতুন মুখ্যমন্ত্ৰী একনাথ সিন্দেৰ মহা পৰিক্ৰমাৰ  কাহিনীয়ে এতিয়া দেশজুৰি চৰ্চা লাভ কৰিছে৷ বহু যুঁজ-বাগৰ, ৰণকৌশলৰ অন্তত একনাথ সিন্দে এতিয়া মহাৰাষ্ট্ৰৰ নতুন মুখ্যমন্ত্ৰী। তেওঁ ৩০ জুনত মুখ্যমন্ত্ৰী হিচাপে শপত গ্ৰহণ কৰিছে। শিৱসেনাৰ নেতা তথা উদ্ধৱ থাকৰেৰ মন্ত্ৰীসভাত গুৰুত্বপূৰ্ণ মন্ত্ৰীৰ পদত থকা একনাথ সিন্দেৰো সম্পত্তিৰ পৰিমাণ কম নহয়৷  আহক চাওঁ প্ৰাক্তন মুখ্যমন্ত্ৰী উদ্ধৱ থাকৰে আৰু দেৱেন্দ্ৰ ফাড়নবিছৰ কিমান সম্পত্তি আছে?

নিৰ্বাচন আয়োগত দিয়া তথ্য অনুসৰি উদ্ধৱ থাকৰেৰ ১৪৩ কোটি ২৬ লাখ টকাৰ সম্পত্তি  আছে৷

নিৰ্বাচনী শপতনামা অনুসৰি সিন্দেৰ মুঠ ১১,৫৬,১২,৪৬৬ টকাৰ স্থাৱৰ আৰু স্থাৱৰ সম্পত্তি আছে। শপতনামাত উল্লেখ থকা  অনুসৰি সিন্দেৰ নিজৰ  আৰু তেওঁৰ পত্নী লতা একনাথ সিন্দেৰ একাউণ্টত নগদ ৩২,৬৪,৭৬০ টকা আছিল। শপতনামাখনত কোৱা হৈছে যে সিন্দে দম্পতীয়ে জীৱন বীমাত ৫০,০৮,৯৩০  টকা বিনিয়োগ কৰিছে। সিন্দে দম্পতীৰ আৰ্মাডা, স্কৰপিঅ’, বোলেৰো, ইনোভা আদিকে ধৰি বিভিন্ন কোম্পানীৰ  সাতখন গাড়ী আছে। সিন্দেৰ ওচৰত এটা অনুজ্ঞাপ্ৰাপ্ত ৰিভলভাৰ আৰু এটা পিষ্টল আছে৷ দুয়োটাৰে মূল্য প্ৰায় ৪.৭৫  লাখ টকা হ’ব। সিন্দে দম্পতীৰ ৯,৪৫,৫০,০০০ টকাৰ স্থাৱৰ সম্পত্তি আছে। ইয়াৰ ভিতৰত একনাথ সিন্দেৰ ৪,৪৭,৫০,০০০ টকাৰ স্থাৱৰ সম্পত্তি থকাৰ লগতে  তেওঁৰ পত্নীৰ ৪,৯৮,০০,০০০কোটি টকাৰ স্থাৱৰ সম্পত্তি আছে। স্থাৱৰ সম্পত্তিৰ দিশৰ পৰা মুখ্যমন্ত্ৰী একনাথ সিন্দেতকৈ তেওঁৰ পত্নী ধনী৷

বিজেপিৰ নেতা তথা মহাৰাষ্ট্ৰৰ প্ৰাক্তন মুখ্যমন্ত্ৰী দেৱেন্দ্ৰ ফাড়নবিছৰ  ৩.৭৮  কোটি টকাৰ সম্পত্তি আছে৷ এই সম্পত্তি  ২০১৪ চনৰ তুলনাত ২০১৯ প্ৰায়  ১০০ শতাংশ বৃদ্ধি পাইছিল৷ শপতনামা অনুসৰি তেওঁৰ সম্পত্তি ২০১৪  চনত আছিল  ১.৮১ কোটি ৷ বৰ্তমান সেই পৰিমাণ  ৩.৭৮  কোটি টকাৰ সমান হৈছে।