ডিজিটেল ডেস্কঃ দোষমুক্ত হ’ল সিংহলী বেটছমেন দনুষ্কা গুণতিলকা৷ শেহতীয়াকৈ শ্ৰীলংকাৰ ক্ৰিকেটাৰ দনুষ্কা গুণতিলকাৰ বিৰুদ্ধে ধৰ্ষণৰ গুৰুতৰ অভিযোগ উত্থাপন হৈছিল। কিন্তু এতিয়া এই বিষয়ত ডাঙৰ সকাহ পাইছে দনুষ্কা গুণতিলকাই।দৰাচলতে দনুষ্কা গুণতিলকাই এই সন্দৰ্ভত ক্লিনশ্বীট লাভ কৰিছে। অষ্ট্ৰেলিয়াৰ নিউ চাউথ ৱেলছ আদালতে শ্ৰীলংকাৰ ক্ৰিকেটাৰগৰাকীক নিৰ্দোষী বুলি ঘোষণা কৰিছে।
ইফালে সকাহ পোৱাৰ পাছত দনুষ্কা গুণতিলকাই প্ৰতিক্ৰিয়া প্ৰকাশ কৰিছে। তেওঁ কয় যে মোৰ জীৱনটো আকৌ স্বাভাৱিক হৈ পৰিছে, মই বহুত সুখী, মই অতি সোনকালে ক্ৰিকেট খেলপথাৰলৈ ঘূৰি আহিব বিচাৰো। পুনৰ ক্ৰিকেট খেলপথাৰলৈ ঘূৰি আহিবলৈ পাই মই অতিশয় উৎসাহিত হৈছো।
প্ৰায় ৫ মাহ পূৰ্বে অষ্ট্ৰেলিয়াৰ নিউ চাউথ ৱেলছত দনুষ্কা গুণতিলকাৰ বিৰুদ্ধে ধৰ্ষণৰ অভিযোগ উঠিছিল যদিও এতিয়া ক্ৰিকেটাৰগৰাকীয়ে সমগ্ৰ বিষয়টোত ক্লিনশ্বীট পাইছে।
এতিয়ালৈকে দনুষ্কা গুণতিলকাই শ্ৰীলংকাৰ হৈ ৮খন টেষ্ট মেচ খেলিছে। ইয়াৰ উপৰিও দনুষ্কা গুণতিলকাই শ্ৰীলংকাক প্ৰতিনিধিত্ব কৰি ৪৭খন এদিনীয়া আৰু ৪৬খন টি-২০ মেচত অংশগ্ৰহণ কৰিছে। দনুষ্কাই ৮খন টেষ্ট মেচত ২৯৯ ৰান সংগ্ৰহ কৰিছে। টেষ্ট ফৰ্মেটত দনুষ্কাৰ গড় ১৮.৬৯ হোৱাৰ বিপৰীতে ষ্ট্ৰাইক ৰেট ৫০.০৮। টেষ্ট ফৰ্মেটত তেওঁৰ নামত ২টা অৰ্ধশতক আছে। তদুপৰি তেওঁ ৪৭খন এদিনীয়া মেচত গড়ে ৩৫.৫৮ আৰু ষ্ট্ৰাইক ৰেট ৮৬.৮২ৰে ১৬০১ ৰান সংগ্ৰহ কৰিছে। এদিনীয়া ফৰ্মেটত দুবাৰকৈ শতক অৰ্জন কৰিছে দনুষ্কাই। টি-২০ ফৰ্মেটত ১২০.৪৯ ষ্ট্ৰাইক ৰেট আৰু গড়ে ৩৫.৫৮ ৰানত ৭৪১ ৰান সংগ্ৰহ কৰিছে দনুষ্কা গুণতিলকাই।
Continue Reading
