সকলোকে কন্দুৱাই কেতিয়াও উভতি নহাৰ বাটেৰে গুচি গ’ল নাট্টু কাকা

ডিজিটেল ডেস্কঃ ‘নাট্টু কাকা’ আৰু নাই৷ SAB TVত সম্প্ৰচাৰিত ‘তাৰক মেহতা কা ওল্টা চশমা’ (Taarak Mehta Ka Ooltah Chashmah) শীৰ্ষক জনপ্ৰিয় কমেডী ধাৰাবাহিকখনৰ ‘নাট্টু কাকা’(Nattu Kaka) অৰ্থাৎ অভিনেতা ঘনশ্যাম নায়ক(Ghanshyam Nayak)ৰ দেহাৱসান৷ এই ধাৰাবাহিকখনৰ বাবে ঘৰে ঘৰে জনপ্ৰিয় আছিল নাট্টু কাকা৷ নাট্টু কাকা ধাৰাবাহিকখনৰ আটাইতকৈ আকৰ্ষণীয় চৰিত্ৰসমূহৰ অন্যতম আছিল।

বিগত কিছুদিনৰ পৰা কেন্সাৰৰ সৈতে যুঁজি আছিল অভিনেতাজন৷ অৱশেষত নিয়তিৰ ওচৰত হাৰ মানি দেওবাৰে পৰলোকলৈ গমন কৰে নাট্টু কাকাই৷ মৃত্যুৰ সময়ত তেওঁৰ বয়স আছিল ৭৬ বছৰ৷ ২০০৮ চনৰ পৰা সম্প্ৰচাৰ হৈ থকা ‘তাৰক মেহতা কা ওল্টা চশমা’ ধাৰাবাহিকখনত আৰম্ভণিৰ পৰাই জড়িত আছিল অভিনেতা ঘনশ্যাম নায়ক৷

বিগত বৰ্ষৰ ছেপ্তেম্বৰ মাহত অভিনেতাগৰাকীৰ ডিঙিত এটা টেমুনা উঠি পিছলৈ ই ডাঙৰ হৈ আহিছিল৷ তাৰ বাবে ডিঙিৰ অস্ত্ৰোপচাৰো কৰিছিল অভিনেতাগৰাকীয়ে।চলিত বৰ্ষৰ এপ্ৰিল মাহত তেওঁৰ ডিঙিত কৰ্কট ৰোগৰ অৱস্থিতি ধৰা পৰে আৰু তেতিয়াৰ পৰাই কেম’থেৰাপী লৈ আছিল নাট্টু কাকাই। নাট্টু কাকাৰ মনোবল ইমানেই বেছি আছিল যে শেষ উশাহ থকালৈকে দৃশ্যগ্ৰহণ কৰি যাব বুলি কৈছিল৷ তেওঁৰ মৃত্যুত গভীৰ শোকৰ ছাঁ পৰিছে সমগ্ৰ টেলিভিশ্বন জগতত৷