ডিজিটেল ডেস্কঃ সোমবাৰে পুৱতি নিশা কঁপি উঠিল তুৰ্কীৰ দক্ষিণৰ অংশ ৷ শক্তিশালী ভূমিকম্পৰ ফলত তাচপাতৰ ঘৰৰ দৰে ভাগি পৰিল শ শ ঘৰ৷ফলত নিহত হৈছে শতাধিক লোক ৷ এতিয়ালৈকে ভাগি পৰা ঘৰবোৰ ধ্বংসস্তুপৰ মাজৰ পৰা ১৮০ টা মৃতদেহ উদ্ধাৰ কৰা হৈছে৷
ৰিখটাৰ স্কেলত ভূমিকম্পৰ প্ৰাবল্য আছিল ৭.৮। প্ৰথম কম্পনৰ অলপ পিছতে মধ্য তুৰ্কীত আন এটা কম্পন অনুভূত হয়। আমেৰিকা যুক্তৰাষ্ট্ৰৰ ভূতাত্ত্বিক জৰীপ (ইউএছজিএছ)ৰ তথ্য অনুসৰি দ্বিতীয় ভূমিকম্পটোৰ প্ৰাবল্য আছিল ৰিখটাৰ স্কেলত ৬.৭। স্থানীয় সংবাদ মাধ্যমৰ খবৰ অনুসৰি লেবানন, চিৰিয়া আৰু চাইপ্ৰাছৰ কিছু অংশতো ভূমিকম্প অনুভৱ কৰা হৈছিল।
উল্লেখ্যত তুৰস্কত বহু বছৰৰ পিছত এনে ডাঙৰ ভূমিকম্প সংঘটিত হৈছে৷ দুৰ্যোগৰ কেইবাটাও ভিডিঅ' ফেচবুক আৰু টুইটাৰত ভাইৰেল হৈ পৰিছে। স্থানীয় সংবাদ মাধ্যমৰ বাতৰি অনুসৰি, এতিয়ালৈকে ১৮০ টা মৃতদেহ উদ্ধাৰ কৰা হৈছে। ভূমিকম্পৰ ফলত কমেও ১৪০ টা ঘৰ খহি পৰিছে।
ধ্বংসস্তূপৰ তলত বহুলোক আৱদ্ধ হোৱাৰ আশংকা কৰা হৈছে। ফলস্বৰূপে, মৃতকৰ সংখ্যা বৃদ্ধি হ'ব পাৰে। এতিয়ালৈকে ৪২২০ জন লোক গুৰুতৰভাৱে আহত হৈছে।
গাজিয়ানটেপ প্ৰদেশৰ ৰাজ্যপাল দাভুত গুলে টুইট কৰি কয়: "আমাৰ চহৰখনত এক শক্তিশালী ভূমিকম্প অনুভৱ কৰা হৈছে। মানুহে এনে বিদৰ পৰিস্থিতিত শান্ত হৈ থাকক। ঘৰৰ বাহিৰত সহায়ৰ বাবে অপেক্ষা কৰক। এই পৰিস্থিতিত গাড়ী নচলাব। অনুগ্ৰহ কৰি ৰাস্তাত ভিৰ নকৰিব। ''
Continue Reading
