ডিজিটেল ডেস্কঃ গুৰুতৰভাবে অসুস্থ হৈ পৰিছে অভিনেতা গুফি পেণ্টাল। মহাভাৰত ধাৰাবাহিকত 'শকুনি মামা' নামৰে দেশবাসীৰ মাজত পৰিচিত পেণ্টালক চিকিৎসালয়ত ভৰ্তি কৰোৱা হৈছে। অভিনেতাগৰাকীৰ ঘনিষ্ঠ মহলে প্ৰকাশ কৰা মতে সংকটজনক অৱস্থাত বলীউডৰ অভিনেতা পেণ্টালক এখন চিকিৎসালয়ত ভৰ্তি কৰোৱা হৈছে।
জানিব পৰা মতে অভিনেতা গুফি পেণ্টাল দীৰ্ঘদিন ধৰি বৃদ্ধাৱস্থাৰ ৰোগত ভুগি আছে। গুফি পেণ্টালে ১৯৮০ ৰ দশকত অভিনয়ৰ জগতত ভৰি দিছিল। তেওঁ কেইবাখনো হিন্দী চলচ্চিত্ৰত অভিনয় কৰিছিল। জনপ্ৰিয় ধাৰাবাহিক মহাভাৰতত তেওঁ শকুনি মামাৰ চৰিত্ৰত অভিনয় কৰি জনপ্ৰিয়তাৰ শীৰ্ষত আৰোহণ কৰিছিল।
মহাভাৰতত কৰা অভিনয়ৰ বাবেই পেইণ্টাল ঘৰে ঘৰে পৰিচিত হৈ পৰিছিল। দৰ্শকে তেওঁক শকুনি মামা হিচাপেই জানিছিল। জনপ্ৰিয় টেলি অভিনেত্ৰী টিনা ঘাইয়ে তেওঁৰ ফেচবুক পৃষ্ঠাত অভিনেতাগৰাকীৰ অসুস্থতাৰ খবৰ প্ৰকাশ কৰিছে।
টিনাই তেওঁৰ অনুৰাগীসকলক অভিনেতাজনৰ আশু আৰোগ্য কামনা কৰিবলৈও আহ্বান জনাইছে। অৱশ্যে পেণ্টালৰ পৰিয়ালে এতিয়ালৈকে অভিনেতাগৰাকীৰ অসুস্থতাৰ বিষয়ে কোনো কথা প্ৰকাশ কৰা নাই।
Continue Reading
