ডিজিটেল ডেস্কঃ উত্তৰ প্ৰদেশৰ চুলতানপুৰৰ এটা শিশুৰ জীৱন ৰক্ষাৰ বাবে ভগৱানে যেন চকু মেলি চালে। ঘটনা অনুসৰি স্পাইনেল মাস্কুলাৰ এট্ৰপি ডিজিজ অৰ্থাৎ এছ এম এ টাইপ ৱান নামৰ এক গুৰুতৰ ৰোগত আক্ৰান্ত এই শিশুটিৰ চিকিৎসাৰ বাবে প্ৰয়োজন ১৬ কোটি টকা। যদি মাত্ৰ কেইমাহমানৰ ভিতৰতে এই ধন সংগ্ৰহ কৰা নহয় আৰু বেজী দিয়া নহয় তেন্তে শিশুটিৰ মৃত্যু হ’ব পাৰে।
প্ৰধানমন্ত্ৰী নৰেন্দ্ৰ মোদীৰ জন্মদিনত বিদেশৰ পৰা হোৱা লাকী ড্ৰ’ত শিশুটিয়ে এই বেজী বিনামূলীয়াকৈ লাভ কৰে। বিজেপিৰ সাংসদ ব্ৰজ ভূষণ সিঙে কয় যে তেওঁ মোদীৰ নাম স্মৰণ কৰিছিল আৰু এই চমৎকাৰ ঘটিছিল। শিশুটিয়ে ১৬ কোটি টকাৰ বেজী বিনামূলীয়াকৈ লাভ কৰে। প্ৰধানমন্ত্ৰী মোদীৰ জন্মদিনৰ এয়া আটাইতকৈ ডাঙৰ উপহাৰ।
চুলতানপুৰত বাস কৰা এক দম্পতীৰ সন্তান অনন্যৰ এটা গুৰুতৰ ৰোগ আছে, যাৰ চিকিৎসা অতি ব্যয়বহুল। এই ৰোগত এটা বেজীৰ খৰচ বেলেগ বেলেগ কোম্পানীত ১৬ৰ পৰা ২০ কোটি, যিটো কোনো স্বাভাৱিক পৰিয়ালৰ বাবে অসম্ভৱ। আৰ্থিক সাহায্য বিচাৰি শিশুটিৰ পৰিয়াল সাংসদ ব্ৰীজ ভূষণ শৰণ সিঙৰ বিষ্ণোহৰপুৰ বাসগৃহত উপস্থিত হয়।
শিশুটিৰ পৰিয়ালে সাংসদগৰাকীক সহায়ৰ বাবে আহ্বান জনায়। ইয়াৰ পিছত চিকিৎসাৰ খৰচৰ কথা শুনি সাংসদগৰাকীও বিবুধিত পৰে। অৱশ্যে তেওঁ শিশুটিক সহায় কৰাৰ সিদ্ধান্ত লয় আৰু সাংসদগৰাকীয়ে ছ’চিয়েল মিডিয়াত আবেদন কৰি ৰাইজক সহায় কৰিবলৈ অনুৰোধ জনায়। সাংসদগৰাকীয়ে দাবী কৰিছে যে ছ’চিয়েল মিডিয়াত আবেদন কৰাৰ কিছু সময়ৰ পাছতে এটা কোম্পানীয়ে লটাৰীৰ জৰিয়তে শিশুটিক বিনামূলীয়াকৈ বেজী দিয়াৰ কথা ঘোষণা কৰে। বেজীৰ মূল্য ১৬ কোটি টকা। এই খবৰে সকলোকে আনন্দিত কৰি তুলিছে।
Continue Reading
