ডিজিটেল ডেস্কঃ দেশৰ বহুতো ৰাজ্যত হিন্দু-মুছলমানৰ বিবাদৰ খবৰ নিৰন্তৰ পোৱা যায়। এনে সময়তে মধ্য প্ৰদেশৰ ভূপালৰ পৰা আহিছে এক হৃদয়স্পৰ্শী খবৰ। ভূপালৰ লক্ষ্মী নাৰায়ণ নামৰ এজন হিন্দু ব্যক্তিয়ে ৫০ বছৰ ধৰি ৰোজা পালন কৰি আহিছে। ৰোজা ৰাখি তেওঁ হিন্দু-মুছলমান ঐক্যৰ এক উদাহৰণ স্থাপন কৰিছে। ৭১ বছৰীয়া লক্ষ্মী নাৰায়ণ খাণ্ডেলৱাল হিন্দু-মুছলমান ঐক্যৰ এক সুন্দৰ উদাহৰণ বুলি বহুলোকেই একমুখে কয়।
লক্ষ্মী নাৰায়ণ খাণ্ডেলৱালে যোৱা ৫০ বছৰ ধৰি ৰোজা ৰখাৰ লগতে মছজিদত নামাজ পঢ়িবলৈও যায়। এনে নহয় যে লক্ষ্মী নাৰায়ণ খাণ্ডেলৱালে কেৱল ইছলামত বিশ্বাস কৰে, তেওঁ সম্পূৰ্ণ বিশ্বাসেৰে নিজৰ হিন্দু ধৰ্মও পালন কৰি আহিছে। নিজ ধৰ্মৰ প্ৰতি থকা আস্থাৰ বাবে তেওঁ দেশৰ প্ৰায় সকলো মন্দিৰ দৰ্শন কৰিছে।পবিত্ৰ ৰমজান মাহত তেওঁ দুবাৰ খোজকাঢ়ি খোৱাজা গৰিব নাৱাজৰ দৰগাহ পৰিদৰ্শন কৰিছে।
লক্ষ্মী নাৰায়ণে কয় যে প্ৰায় ৫০ বছৰ আগতে খোৱাজা গৰিব নাৱাজ তেওঁৰ সপোনত দৰ্শন দিছিল আৰু তেওঁক নামাজ পঢ়িবলৈ আৰু ৰোজা ৰাখিবলৈ কৈছিল। তেতিয়াৰ পৰা তেওঁ এই নিয়ম পালন কৰি আহিছে।
তেওঁৰ পৰিয়ালত তিনিটা সন্তান আছে আৰু কোনেও তেওঁক ৰোজা ৰখা আৰু নামাজ পঢ়াত বাধা প্ৰদান নকৰে। লক্ষ্মী নাৰায়ণ খাণ্ডেলৱালে সমাজত বাৰ্তা দিব বিচাৰে যে হিন্দু-মুছলমানে নিজৰ মাজত যুঁজ দিব নালাগে। সকলোৱে মিলিজুলি এখন সুস্থ সমাজ গঢ়াত আগভাগ ল'ব লাগে।
Continue Reading
