ডিজিটেল ডেস্ক : উচ্চতম ন্যায়ালয়ে সোমবাৰে স্কুলীয়া শিক্ষাক লৈ পিতৃ-মাতৃৰ উদ্বেগ সম্পৰ্কত এক গুৰুত্বপূৰ্ণ মন্তব্য কৰে৷ শিশুসকলক তেওঁলোকৰ মানসিক স্বাস্থ্যৰ প্ৰতি লক্ষ্য ৰাখি অতি কম বয়সতে তেওঁলোকক বিদ্যালয়লৈ পঠিয়াব নালাগে বুলি ন্যায়ালয়ে মত প্ৰকাশ কৰে৷
ন্যায়াধীশ সঞ্জয় কিষাণ কৌল আৰু এম এম সুন্দ্ৰেশৰ বিচাৰপীঠে মন্তব্য কৰে যে, 'শিশুসকলক বিদ্যালয়লৈ পঠিয়াবলৈ এক প্ৰকাৰৰ খৰধৰ কৰা হয়। পিতৃ-মাতৃয়ে তেওঁলোকৰ সন্তানৰ দুবছৰ বয়স হোৱাৰ লগে লগে বিদ্যালয়লৈ পঠোৱাৰ ব্যৱস্থা আৰম্ভ কৰিব বিচাৰে। এইটো তেওঁলোকৰ মানসিক স্বাস্থ্যৰ বাবে অনুকূল নহ'ব পাৰে।'
বিচাৰপীঠখনে আগন্তুক শৈক্ষিক অধিৱেশনৰ বাবে কেন্দ্ৰীয় বিদ্যালয়ত প্ৰথম শ্ৰেণীত নামভৰ্তিৰ বাবে ছয় বছৰৰ নিম্নতম বয়সৰ চৰ্তক প্ৰত্যাহ্বান জনাই অভিভাৱকৰ এটা গোটৰ আবেদনৰ শুনানি গ্ৰহণ কৰিছিল। দিল্লী উচ্চ ন্যায়ালয়ৰ ১১ এপ্ৰিলৰ আদেশক প্ৰত্যাহ্বান জনাই অভিভাৱকসকলে দাবী কৰে যে কেন্দ্ৰীয় বিদ্যালয় সংগঠনে (কেভিএছ) ২০২২ চনৰ মাৰ্চত নামভৰ্তি প্ৰক্ৰিয়া আৰম্ভ হোৱাৰ মাত্ৰ চাৰি দিন আগতে হঠাতে ১ম শ্ৰেণীৰ পৰা ছয় বছৰৰ বাবে নামভৰ্তিৰ চৰ্ত সলনি কৰে। পূৰ্বৱৰ্তী চৰ্ত অনুসৰি বয়সৰ সীমা আছিল পাঁচ বছৰ।
বিচাৰপীঠে এইদৰে কৈছিল: 'এটি শিশুক বিদ্যালয়ত ভৰ্তি কৰাৰ সঠিক বয়স আছে। শিশুটোক অত্যাধিক কষ্ট নিদিব। ইয়াৰ দ্বাৰা শিশুটিৰ বুজি পোৱা আৰু পঢ়াৰ সামৰ্থ্যক প্ৰভাৱিত কৰাৰ লগতে মানসিকভাৱেও প্ৰভাৱ পৰিব পাৰে।'
Continue Reading
