ডিজিটেল ডেস্কঃ জনপ্ৰিয় গায়ক য়’ য়’ হানী সিঙৰ পত্নীৰ সৈতে বিবাহ বিচ্ছেদ ঘটিছে। শেহতীয়াকৈ দিল্লীৰ এখন আদালতত পত্নী শালিনী তলৱাৰৰ সৈতে ১ কোটি টকাৰ সাহায্যমূলক পুজিঁৰ বিনিময়ত বিবাহ বিচ্ছেদ হয় হানী সিঙৰ। পত্নী শালিনীয়ে হানী সিঙৰ বিৰুদ্ধে ঘৰুৱা হিংসা আৰু মানসিক শোষণৰ অভিযোগ উত্থাপন কৰি বিবাহ বিচ্ছেদৰ বাবে আবেদন কৰিছিল। ২০২১ৰ ৩ছেপ্তেম্বৰৰ পৰা ইয়াৰ শুনানি প্ৰক্ৰিয়া আৰম্ভ হৈছিল।
পত্নী শালিনী তালৱাৰে যোৱা বছৰ দিল্লীৰ তিছ হাজাৰী আদালতত হানী সিঙৰ বিৰুদ্ধে ঘৰুৱা হিংসা আৰু আন মহিলাৰ সৈতে শাৰীৰিক সম্পৰ্ককে ধৰি কেইবাটাও গুৰুতৰ অভিযোগত বিবাহ বিচ্ছেদৰ বাবে আবেদন জনাইছিল। হানী সিঙৰ পৰা বিবাহ বিচ্ছেদৰ বাবে ১০ কোটি টকাৰ দাবী কৰিছিল শালিনীয়ে কিন্তু এতিয়া এক কোটি টকাৰ ওপৰত দুয়োৰে মাজত এক নিষ্পত্তি হৈছে। এতিয়া আনুষ্ঠানিকভাৱে বিবাহ বিচ্ছেদ হৈছে হানী সিং আৰু শালিনীৰ। দিল্লীৰ সাকেত জিলা আদালতৰ পৰিয়াল আদালতত হানী সিঙে ১ কোটি টকাৰ চেক এখন ছীল কৰা খামত অৰ্পণ কৰে শলিনী তালৱাৰক।
উল্লেখ্য যে, এই বিবাহ বিচ্ছেদক লৈ পৰৱৰ্তী শুনানি হ’ব ২০২৩ৰ ২০মাৰ্চত।
শালিনী তালৱাৰে কৰা অভিযোগৰ পাছত হানি সিঙে ২০২১ চনৰ ৬ আগষ্টত ছ’চিয়েল মিডিয়াত এটা পষ্ট শ্বেয়াৰ কৰিছিল। য’ত তেওঁ এই অভিযোগসমূহ তীব্ৰভাৱে অস্বীকাৰ কৰিছিল। তেওঁ কৈছিল যে ''মোৰ আৰু মোৰ বিৰুদ্ধে ভুৱা অভিযোগ উত্থাপন হোৱাটো অতি দুখৰ বিষয়। এই অভিযোগবোৰে মোক বহুত আমনি কৰিছে। মোৰ বিৰুদ্ধে উত্থাপিত অভিযোগ অতি নিন্দনীয় আৰু এইবোৰ মোক হাৰাশাস্তি কৰাৰ বাবে কৰা হৈছে।''
২০১১ চনত হানি সিং আৰু শালিনী তালৱাৰ বিবাহপাশত আৱদ্ধ হৈছিল। দুয়োৰে প্ৰেম কাহিনী স্কুলৰ পৰাই আৰম্ভ হৈছিল। ২০ বছৰ ধৰি ইজনে সিজনৰ লগত ডেটিং কৰিছিল। বিবাহৰ ১০ বছৰ পাছত হানি সিং আৰু শালিনী তালৱাৰৰ বিবাহ বিচ্ছেদ হয়।
Continue Reading
