ডিজিটেল ডেস্কঃ বান্দৰৰ অতপালিয়ে মানৱ সমাজক বৰকৈ অতীষ্ঠ কৰে। সংসদ ভৱন কমপ্লেক্সত উপদ্ৰৱ কৰা বান্দৰবোৰক খেদিবলৈ চৰকাৰে গ্ৰহণ কৰিছে এক বিশেষ পদক্ষেপ। এই বান্দৰবোৰক খেদিবলৈ ৪জন লোকক নিযুক্তি দিয়া হৈছে। সংসদ সুৰক্ষা সেৱাৰ চক্ৰান্তৰ পৰা এই তথ্য লাভ কৰা হৈছে। এই চাৰিওজন লোকে লেংগুৰৰ মাত উলিয়াই বান্দৰবোৰক ভয় খুৱাব। লেংগুৰক বান্দৰে ভয় কৰে আৰু সমীহ কৰি চলে। লেংগুৰ থকা ঠাইত বান্দৰ নাথাকে।
সংসদ নিৰাপত্তা সেৱাই জাৰি কৰা বিবৃত্তি অনুসৰি সংসদ ভৱন কমপ্লেক্সত সঘনাই বান্দৰৰ উপস্থিতি দেখা পোৱা গৈছে। বহু কষ্ট কৰিও কৰ্তৃপক্ষই বান্দৰ খেদিব নোৱাৰা হ’ল। অৱশেষত বহু ভাবি চিন্তি লেংগুৰৰ মাত উলিয়াব পৰা চাৰিজন লোকক নিযুক্তি দিয়া হ’ল। বান্দৰবোৰক খেদিবলৈ দুই প্ৰকাৰৰ লোক নিযুক্তি কৰা হৈছে। এটা শ্ৰেণী দক্ষ আৰু আনটো শ্ৰেণী অদক্ষ। দক্ষ লোক দুজনক ১৭,৯৯০ টকা আৰু অদক্ষ লোক দুজনক ১৪,৯০০ টকাৰ সন্মানীয় ধন প্ৰদান কৰা হৈছে। সংসদত বান্দৰ খেদিবলৈ ব্যস্ত থকা এজন শ্ৰমিকে কয় যে পূৰ্বে বান্দৰ খেদিবলৈ লেংগুৰ ৰখা হৈছিল, কিন্তু এতিয়া ইয়াক নিষিদ্ধ কৰা হৈছে। সেয়েহে উপায় নাপায় মানুহেই উলিয়াব লগা হৈছে লেংগুৰৰ মাত।
ইয়াৰ পূৰ্বেও ২০১৪ চনত বান্দৰৰ আতংকৰ পৰা হাত সাৰিবলৈ চৰকাৰে এনে ৪০ জনীয়া এটা দল প্ৰস্তুত কৰিছিল, যিসকল লেংগুৰৰ বেশত আছিল। লেংগুৰৰ বেশত যুৱকসকলক দেখি বান্দৰবোৰে পলাই গৈছিল আৰু এইদৰে আতংকৰ পৰা হাত সাৰিব পৰা গৈছিল। এই ৪০টা ‘মানৱ লেংগুৰ’ৰ উপৰিও বান্দৰক খেদিবলৈ এনডিএমচিয়ে ৰবৰৰ বুলেট গানো ক্ৰয় কৰিছিল। মানৱ লেংগুৰে এই কামৰ বাবে দিনটোত ৭০০-৮০০ টকা পাইছিল আৰু এমাহত প্ৰায় ১৫ দিন কাম পাইছিল। ইয়াৰ উপৰিও বান্দৰৰ ওপৰত গুলীও নিক্ষেপ কৰা হৈছিল। এয়া প্ৰকৃত গুলীৰ সলনি ৰবৰৰ গুলী আছিল।
Continue Reading
