সংসদতে সাংসদৰ চোলাৰ ক’লাৰত ধৰিছিল ছোনিয়া গান্ধীয়ে! বিজেপি সাংসদ নিশিকান্ত দুবেৰ দাবী

দুবেই দাবী কৰে যে  যেতিয়া ভি নাৰায়ণস্বামীয়ে অনুসূচিত জাতি/জনজাতিৰ বাবে সংৰক্ষণ সম্পৰ্কীয়  এখন বিধেয়ক উপস্থাপন কৰি আছিল, সমাজবাদী পাৰ্টিৰ তদানীন্তন  সাংসদ যশবীৰ সিঙে  বিধেয়ক খন কাঢ়ি লৈছিল আৰু সেয়া  ছিঙি পেলাইছিল। দুবেই লগতে  কয়  যে তেতিয়া ছোনিয়া গান্ধীয়ে খঙৰ ভমকত  সিঙৰ ওচৰলৈ গৈছিল আৰু তেওঁৰ  চোলাৰ কলাৰত ধৰিছিল। দুবেই কয় "মই বেঞ্চখন জপিয়াই তেওঁৰ ওচৰলৈ গৈছিলো আৰু ছোনিয়া গান্ধীক  কৈছিলো  আপুনি আমাৰ একনায়ক শাসক নহয়, ৰাণী নহয়, আপুনি হিংসাৰ আশ্ৰয় ল'ব নোৱাৰে,"।যদি বিজেপি তাত নাথাকিলহেঁতেন তেন্তে এছপি ৰ সাংসদসকল বাচি নাথাকিলহেঁতেন বুলিও দুবেই কয়।

২০১২ চনৰ কথা মনত পেলাই দুবেই বুধবাৰে ছোনিয়া গান্ধীক লক্ষ্য কৰি কয়  "আপুনি সাংসদসকলক হত্যা কৰিবলৈ চেষ্টা কৰিছিল"।উল্লেখ্য মহিলা সংৰক্ষণ বিধেয়ক সন্দৰ্ভত বুধবাৰে লোকসভাত  চৰ্চা চলে। আলোচনাৰ আৰম্ভণি কৰে কংগ্ৰেছৰ সাংসদ ছোনিয়া গান্ধীয়ে। ছোনিয়া গান্ধীয়ে কংগ্ৰেছে এই বিধেয়কখন সমৰ্থন কৰে বুলিও মন্তব্য কৰে। তেওঁ  বিধেয়কখন সন্দৰ্ভত চৰকাৰৰ সন্মুখত বহু প্ৰশ্নও উত্থাপন কৰে। ইয়াৰ পিছতে ভাষণ দিবলৈ থিয় দিয়ে  বিজেপিৰ সাংসদ নিশিকান্ত দুবেই। ভাষণৰ আৰম্ভনিৰ পৰা শেষলৈ কংগ্ৰেছকে ধৰি সমগ্ৰ বিৰোধীক তীব্ৰ আক্ৰমণ চলায়  দুবেই। তেওঁ কয় যে কংগ্ৰেছ দলে কেতিয়াও নাৰীক আগুৱাই নিয়াৰ বাবে পদক্ষেপ গ্ৰহণ কৰা নাছিল।

 এই বিধেয়কখন কাৰ্যকৰী কৰাত কিয় পলম হৈছে বুলি প্ৰশ্ন উত্থাপন কৰিছিল ছোনিয়া গান্ধীয়ে। ইয়াৰ উত্তৰত দুবেই কয় যে এয়া এক আইনী প্ৰক্ৰিয়া। বিৰোধীয়ে এতিয়া বিভ্ৰান্তিমূলক  পৰিবেশ সৃষ্টি কৰিবলৈ চেষ্টা কৰিছে। ছোনিয়াৰ বিৰুদ্ধে অভিযোগ উত্থাপন কৰি তেওঁ কয় যে ছোনিয়া গান্ধীয়ে এই বিধেয়কখনৰ কৃতিত্ব  ল’বলৈ চেষ্টা চলাইছে। কিন্তু কংগ্ৰেছ এনে কৃতিত্বৰ দাবীদাৰ নহয়। হঠাতে দুবেই সংসদত ঘটি যোৱা  কিছুমান ঘটনাৰ কথাও উল্লেখ কৰে।বিজেপি সাংসদ নিশিকান্ত দুবেই কয় যে আমাৰ দেশ  সংবিধানৰ আধাৰত পৰিচালিত। ছোনিয়া গান্ধীয়ে ভাষণত কৈছিল  যে তেওঁলোকে  পঞ্চায়তত মহিলাৰ বাবে  সংৰক্ষণৰ ব্যৱস্থা কৰিছিল।সংবিধানৰ  ২৪৩ (ঘ) অনুচ্ছেদও কংগ্ৰেছৰেই  অৱদান। কিন্তু তাত অ’বিচিৰ বাবে  সংৰক্ষণৰ কথা ক’তো উল্লেখ কৰা হোৱা নাই বুলি দুবেই প্ৰকাশ কৰে।দুবেই স্পষ্টভাবে কয় যে  ১৯৫২ চনৰ পৰা আজিলৈকে কোনেও অবিচিৰ বাবে  সংৰক্ষণৰ কথা কোৱা নাই। কংগ্ৰেছে  পঞ্চায়তত অবিচিৰ বাবে  আগতে কিয় সংৰক্ষণৰ ব্যৱস্থা কৰা নাছিল বুলিও বিজেপিৰ সাংসদগৰাকীয়ে প্ৰশ্ন কৰে।