শনিবাৰৰ পৰা মহাৰাষ্ট্ৰত নাথাকিব কোনোধৰণৰ ক’ভিড নিষেধাজ্ঞা

ডিজিটেল ডেস্ক : মহাৰাষ্ট্ৰৰ কেবিনেটে বৃহস্পতিবাৰে ৰাজ্যজুৰি সকলো ক’ভিড-১৯ নিষেধাজ্ঞা উঠাই লোৱাৰ সিদ্ধান্ত গ্ৰহণ কৰিছে৷ যি ২ এপ্ৰিলৰ পৰা কাৰ্যকৰী হ’ব। ৰাজ্যখনত ক'ভিড-১৯ৰ সংক্ৰমণৰ হাৰ তীব্ৰ হ্ৰাস হোৱাৰ ফলত আৰু কেন্দ্ৰৰ দ্বাৰা দুৰ্যোগ ব্যৱস্থাপনা আইনৰ ব্যৱস্থাসমূহ প্ৰত্যাহাৰ কৰাৰ মাজতে এই শিথিলতা প্ৰদান কৰা হৈছে।

ৰাজ্যখনৰ স্বাস্থ্যমন্ত্ৰী ৰাজেশ টোপে কয় যে, মুখ্যমন্ত্ৰী আৰু কেবিনেটে সিদ্ধান্ত লৈছে যে ২ এপ্ৰিলৰ পৰা, মহামাৰী আইন আৰু দুৰ্যোগ ব্যৱস্থাপনা আইন প্ৰত্যাহাৰ কৰা হ'ব। মহাৰাষ্ট্ৰ চৰকাৰে মুম্বাইৰ স্থানীয় ৰে'লত ভ্ৰমণ কৰা লোকসকলৰ বাবে মাস্ক পৰিধান কৰা আৰু দুবাৰ টিকাকৰণ বাধ্যতামূলকভাৱে আঁতৰ কৰাৰ সিদ্ধান্ত লৈছে।

স্বাস্থ্যমন্ত্ৰী ৰাজেশ টোপে লগতে কৈছিল যে, কেৱল বাধ্যবাধকতা প্ৰত্যাহাৰ কৰাৰ অৰ্থ এইটো নহয় যে মানুহে সাৱধানতা অৱলম্বন কৰিব নালাগে। সাৱধানতাৰ মাজেৰে সকলোৰে সহযোগিতাৰে ক’ভিডৰ সকলো নিষেধাজ্ঞা উঠাই লোৱা হৈছে বুলি ব্যক্ত কৰে মন্ত্ৰীজনে৷