ডিজিটেল ডেস্ক: 'বুধিয়ক কাউৰী' এই কাহিনীটো আমি সকলোৱে শৈশৱতে নিশ্চয় শুনিছো। য’ত পিয়াহত কণ্ঠ শুকাই থকা কাউৰী এটাই আধা ভৰ্তি কলহৰ পানী খাবলৈ শিলগুটি ভৰাই পানীৰ স্তৰ বৃদ্ধি কৰি পিয়াহ নিবাৰণ কৰিছিল। শেহতীয়াকৈ এই কাহিনী সঁচা হোৱা দেখা গৈছিল, এটা ভিডিঅ' চৰ্চালৈ অহাৰ পাছত ছ’চিয়েল মিডিয়াত ক্ৰমান্বয়ে ভাইৰেল হৈ পৰিছে। য’ত এটা কাউৰীয়ে পানী খাবলৈ শিলগুটি ব্যৱহাৰ কৰা দেখা যায়।
দৰাচলতে @TansuYegen নামৰ এটা টুইটাৰ একাউণ্টত ছ’চিয়েল মিডিয়াত এটা ভিডিঅ’ প্ৰকাশ পাইছে, য’ত এটা পানীৰ বটল ঘাঁহনি পথাৰত ৰখা দেখা গৈছে। য’ত পিয়াহত থকা কাউৰী এটাই ঠোঁট সুমুৱাই পানী খাবলৈ চেষ্টা কৰা দেখা যায়। এই সময়ত তেওঁ বহুবাৰ চেষ্টা কৰে যদিও বটলৰ ভিতৰত পানীৰ মাত্ৰা কম হোৱাৰ বাবে পানী খাবলৈ অক্ষম হয়। ইয়াৰ পিছত তেওঁ বুদ্ধি প্ৰয়োগ কৰি পিয়াহ নিবাৰণ কৰে।
ভিডিঅ’টোত কাউৰীটোৱে পানী খাব নোৱাৰি বটলৰ চাৰিওফালে পৰি যোৱা শিলগুটিবোৰ দেখি ঠোঁটত তুলি লৈ পানীৰ বটলত ভৰাই দিয়ে। ইয়াৰ পাছত বটলৰ ভিতৰৰ পানীৰ স্তৰ ওপৰলৈ উঠি যায়। তেনেকৈয়ে বটলত ঠোঁট ভৰাই কিছু পানী খোৱাৰ পাছত আকৌ কাউৰীটোৱে শিলগুটি তুলি বটলত ভৰাই পানী খোৱা দেখা যায়। ছ’চিয়েল মিডিয়াত প্ৰকাশ পোৱাৰ পাছতে সকলো স্তম্ভিত হৈ পৰিছে।
বৰ্তমান এই ভিডিঅ’টোৱে ছ’চিয়েল মিডিয়াত সকলোৰে দৃষ্টি আকৰ্ষণ কৰিছে। বৰ্তমানলৈকে ভিডিঅ'টোৱে ছচিয়েল মিডিয়াত ৪ লাখ ২৪ হাজাৰতকৈ অধিক ভিউ আৰু ৭ হাজাৰতকৈ অধিক লাইক লাভ কৰিছে। ভিডিঅ’টো চোৱাৰ পাছত ব্যৱহাৰকাৰীসকলে তেওঁলোকৰ আচৰিত প্ৰতিক্ৰিয়াৰ ওপৰত মন্তব্য আগবঢ়াইছে। এজন ব্যৱহাৰকাৰীয়ে মন্তব্য কৰি লিখিছে যে ‘কাউৰী হৈছে যুক্তিৰ ক্ষমতা থকা কেইটামান অমানৱীয় প্ৰজাতিৰ ভিতৰত অন্যতম’। আন এজন ব্যৱহাৰকাৰীয়ে ভিডিঅ' টোৰ ওপৰত মন্তব্য কৰি কাউৰীটোক আটাইতকৈ চতুৰ চৰাইৰ ভিতৰত অন্যতম বুলি অভিহিত কৰা হৈছে।
Continue Reading
