ডিজিটেল ডেস্কঃ মাজ আকাশতে 'হট এয়াৰ বেলুন’ত ভয়ংকৰ অগ্নিকাণ্ড সংঘটিত হৈছে। বেলুনটোত জুই লগাৰ ফলত এটি শিশু অগ্নিদগ্ধ হয়। আতংকিত হৈ জঁপিয়াই মৃত্যুমুখত পৰে দুজন পৰ্যটক। এই ভয়ংকৰ ঘটনা ঘটিছে মেক্সিকো চহৰত।
স্থানীয় প্ৰশাসনৰ সূত্ৰ অনুসৰি মেক্সিকো চহৰৰ পৰা ৭০ কিলোমিটাৰ দূৰত্বত অৱস্থিত টিওটিহুয়াকানত সংঘটিত হৈছে এই দুৰ্ঘটনা। টিওটিহুয়াকান এটা জনপ্ৰিয় প্ৰত্নতাত্ত্বিক স্থান। প্ৰতি বছৰে বহু পৰ্যটক এই প্ৰত্নতাত্ত্বিক স্থানলৈ গৈ পিৰামিডসমূহ চায়। শনিবাৰেও পৰ্যটকৰ বিপুল ভিৰ। সমগ্ৰ প্ৰত্নতাত্ত্বিক স্থানত ওপঙিবলৈ ‘হট এয়াৰ’ বেলুনৰো ব্যৱস্থা আছে।
ব্যক্তিগত উদ্যোগত ১৫০ ডলাৰৰ বিনিময়ত সেই ‘হট এয়াৰ’ বেলুনটোত পৰ্যটকক ইফালে সিফালে দেখুওৱা হয়। শনিবাৰেও কেইবাজনো পৰ্যটকে গৰম বতাহৰ বেলুনত প্ৰত্নতাত্ত্বিক স্থানটো অন্বেষণ কৰিছিল। এই দুৰ্ঘটনাটো এটা বেলুনত সংঘটিত হয়। প্ৰত্যক্ষদৰ্শীয়ে জনোৱা মতে, উৰণৰ কিছু সময়ৰ পিছতে হট এয়াৰ বেলুন এটাৰ গণ্ডোলাত হঠাতে জুই লাগে। আতংকিত হৈ পৰিল পৰ্যটকসকল। বেলুনটোৰ উচ্চতা আছিল ১৫০-২০০ ফুট। বেলুনত জুই দ্ৰুতগতিত বিয়পি পৰাত দুজন পৰ্যটক আতংকিত হৈ জপিয়াই মৃত্যুমুখত পৰে।
বেলনুত কিমানজন লোক আছিল সেই কথা স্পষ্ট কৰিব পৰা নাই স্থানীয় প্ৰশাসনে। দুজন লোকৰ মৃত্যু হোৱাটো নিশ্চিত কৰে। নিহতসকলৰ ভিতৰত আছে এগৰাকী ৩৯ বছৰীয়া মহিলা আৰু পঞ্চাশৰ দশকৰ এজন পুৰুষ পৰ্যটক। প্ৰশাসনে তেওঁলোকৰ নাম আৰু পৰিচয় প্ৰকাশ কৰা নাই। এই দুৰ্ঘটনা কেনেদৰে সংঘটিত হয় তাৰ তদন্ত অব্যাহত ৰাখিছে বুলি জানিবলৈ দিয়ে আৰক্ষীয়ে। এই ধৰণৰ মনোৰঞ্জনত সুৰক্ষাৰ বিষয়টো সঠিকভাৱে সমাধান কৰা হৈছে নে নাই সেই লৈ প্ৰশ্ন উত্থাপন হ’বলৈ আৰম্ভ কৰিছে।
Continue Reading
