ডিজিটেল ডেস্কঃ এখন বিমানত হোৱা তীব্ৰ জোকাৰণিৰ ফলত মাজ আকাশতে আহত হৈছিল এজন যাত্ৰী। ফলত বিমানখন গন্তব্যস্থানলৈ নোযোৱাকৈ ওচৰৰ বিমানবন্দৰত খৰখেদাকৈ অৱতৰণ কৰা হয়। কিন্তু ৰক্ষা নপৰিল যাত্ৰীগৰাকী। বিমানবন্দৰৰ পৰা যাত্ৰীজনক চিকিৎসালয়লৈ নিয়াৰ পাছত চিকিৎসকে তেওঁক মৃত ঘোষণা কৰে। এই ঘটনাত জেট বিমানখনৰ ককপিট আৰু ডাটা ৰেকৰ্ডাৰৰ তথ্য বিশ্লেষণ কৰা হ’ব বুলি দেওবাৰে সংবাদ সংস্থা এ পিয়ে প্ৰকাশ কৰিছে।
বাতৰিৰ সূত্ৰ অনুসৰি, শুকুৰবাৰে বিয়লি নিউ ইংলেণ্ডৰ ওপৰেৰে উৰা মাৰিছিল বম্বাৰ্ডিয়াৰ ইনকৰ্পৰেশ্যনৰ এখন কাৰ্যবাহী জেট। তাত ৫ জন যাত্ৰী আছিল। নিউ ইংলেণ্ডত জেট বিমানত হঠাতে জোকাৰণি আৰম্ভ হয়। সেই জোকাৰণিত আহত হয় যাত্ৰীসকল।
ৰাষ্ট্ৰীয় পৰিবহণ সুৰক্ষা ব’ৰ্ডৰ মুখপাত্ৰ ছাৰা ছালিকে জনোৱা মতে, শুকুৰবাৰে বিয়লি নিউ হামচায়াৰৰ কিনৰ পৰা ভাৰ্জিনিয়াৰ লিডছবাৰ্গলৈ বিমানখন উৰণৰ কথা আছিল যদিও কানেকটিকাটৰ ব্ৰেডচি আন্তঃৰাষ্ট্ৰীয় বিমানবন্দৰত অৱতৰণ কৰিবলৈ বাধ্য হয়। সন্ধিয়া প্ৰায় ৪.৩০ বজাত বিমানবন্দৰত অৱতৰণ কৰি এজন যাত্ৰীক চিকিৎসালয়লৈ লৈ যোৱা হয়। তাতেই তেওঁক মৃত বুলি ঘোষণা কৰা হৈছে বুলি কানেকটিকাট আৰক্ষীয়ে জনায়।
সংবাদ সংস্থা এ পিৰ মতে, এন টি এছ বিয়ে যাত্ৰী বা বিমানখনৰ বিষয়ে বিশেষ তথ্য প্ৰকাশ কৰা নাই। লগতে জোকাৰণিৰ সময়ত যাত্ৰীজনে ছিটবেল্ট পিন্ধিছিল নে বা বিমানখনৰ কিমান ক্ষতি হৈছিল সেই সন্দৰ্ভতো কোনো কথা প্ৰকাশ কৰা নাই। অৱশ্যে আন যাত্ৰীৰ বক্তব্য লিপিবদ্ধ কৰাৰ উপৰিও এন টি এছ বিয়ে তদন্ত আৰম্ভ কৰিছে।
Continue Reading
