ডিজিটেল ডেস্কঃ ৰাজস্থানৰ কোটাত পুনৰ মেধাৱী ছাত্ৰৰ আত্মহত্যা। কোটাত মেধাৱী ছাত্ৰ-ছাত্ৰীৰ আত্মহত্যাৰ ঘটনাই সকলোকে চিন্তিত কৰি তুলিছে।
শেহতীয়াকৈ আত্মহত্যা কৰা ভাৰত নামৰ ছাত্ৰজনে চিকিৎসা মহাবিদ্যালয়ত নামভৰ্তিৰ বাবে NEET পৰীক্ষাৰ প্ৰস্তুতি চলাইছিল। এই কথা সদৰী কৰিছে ৰাজস্থান আৰক্ষীয়ে।
২০২৪ বৰ্ষত কোটাত সংঘটিত হোৱা এয়া সপ্তমটো আত্মহত্যাৰ ঘটনা।
ভাৰতে এটা ছুইচাইড নোটো লিখি থৈ গৈছে। তেওঁ লিখিছে- "আই এম ছ'ৰী পাপা। মই এইবাৰো নোৱাৰিলোঁ। " ভাৰতৰ কোঠাৰ ভিতৰৰ পৰা ছুইচাইড নোটটো উদ্ধাৰ কৰিছে আৰক্ষীয়ে।
ৰাজস্থান কোটাৰ পৰা ৪০০ কিলোমিটাৰ নিলগৰ ঢোলপুৰত ঘৰ আছিল মেধাৱী ছাত্ৰজনৰ।
উল্লেখযোগ্য যে JEE আৰু NEETৰ দৰে প্ৰতিযোগিতামূলক পৰীক্ষাৰ বাবে প্ৰস্তুতি চলাবলৈ প্ৰতি বছৰে দুই লাখৰো অধিক ছাত্ৰ-ছাত্ৰী কোটালৈ আহে।ৰাজস্থানৰ কোটা প্ৰতিযোগিতামূলক পৰীক্ষাৰ প্ৰশিক্ষক কেন্দ্ৰ হিচাপে বিখ্যাত। আই আই টিৰ প্ৰৱেশ পৰীক্ষাৰ পৰা আৰম্ভ কৰি অভিযান্ত্ৰিক আৰু চিকিৎসকৰ প্ৰতিযোগিতামূলক পৰীক্ষালৈকে কোচিং হাব হিচাপে পৰিচিত কোটা। দেশৰ বিভিন্ন প্ৰান্তৰ পৰা ছাত্ৰ-ছাত্ৰীসকলে তাৰ পৰাই পঢ়া-শুনা কৰিবলৈ কোটালৈ আহে। কিন্তু তাৰ মাজতে কিছুমান ছাত্ৰ-ছাত্ৰীয়ে অভিভাৱকৰ হেঁচা আৰু মানসিক চাপ সহিব নোৱাৰি আত্মহত্যাৰ পদক্ষেপ গ্ৰহণ কৰে।
যোৱা বছৰ অৰ্থাৎ ২০২৩ চনতো কোটাত ২৯ জন ছাত্ৰই আত্মহত্যা কৰিছিল। ২০২২ চনত সেই সংখ্যা আছিল ১৫। ৰাজস্থান চৰকাৰে কোচিং চেণ্টাৰসমূহক ছাত্ৰ-ছাত্ৰীৰ মানসিক চাপ কমোৱাৰ বাবে বিভিন্ন পদক্ষেপ ল’বলৈ কয় যদিও ইয়াৰ কোনো উল্লেখযোগ্য ফলাফল পোৱা নাই।
Continue Reading
