ডিজিটেল ডেস্কঃ এজনী ১০ বছৰীয়া কণমানি। কণমানিজনী বৰ্তমান এই পৃথিৱীত নাই। মৃত্যুৰ আগে আগে এই ১০ বছৰীয়া কিশোৰীগৰাকীয়ে পূৰণ কৰিলে এক সপোন। নিজৰ প্ৰেমিকৰ সৈতে বিয়া হোৱাৰ সপোন দেখিছিল ছোৱালীজনীয়ে। ছোৱালীজনী লিউকেমিয়া ৰোগত আক্ৰান্ত আছিল। মৃত্যুৰ মাত্ৰ ১২ দিন পূৰ্বে শৈশৱৰ প্ৰেমিকৰ সৈতে বিবাহপাশত আৱদ্ধ হয় ছোৱালীজনী। ছোৱালীজনীৰ নাম এমা এডৱাৰ্ডছ আৰু এমাৰ প্ৰেমিকৰ নাম ডেনিয়েল মাৰ্শ্বেল ক্রিষ্টোফাৰ। এই ঘটনা আমেৰিকাৰ।
যোৱা বছৰৰ এপ্ৰিল মাহত এমা একুইট লিম্ফোব্লাষ্টিক লিউকেমিয়া (ALL) ৰোগত আক্ৰান্ত হৈছিল। তেওঁৰ পিতৃ-মাতৃ আলিনা আৰু এৰন এডৱাৰ্ডছে কয় যে তেওঁলোক আশাবাদী আছিল যে তেওঁলোকৰ কন্যাই এই ৰোগক পৰাস্ত কৰিব পাৰিব। কিন্তু এই বছৰৰ জুন মাহত চিকিৎসকে পৰিয়ালটোক হৃদয়বিদাৰক খবৰটো দি ক’লে যে এমাৰ কৰ্কট ৰোগ নিৰাময় কৰিব নোৱাৰি আৰু তেওঁ এই পৃথিৱীত কেইদিনমানহে জীয়াই থাকিব।
এই দুখৰ খবৰটো পোৱাৰ পাছত এমাৰ পিতৃ-মাতৃ দুখত ভাগি পৰে। তেওঁলোকে নিজক চম্ভালি লোৱাৰ পাছত কন্যাৰ সপোন পূৰ কৰিবৰ বাবে সিদ্ধান্ত লয়। এমাই ডাঙৰ হৈ সমবয়সীয়া প্ৰেমিক ডেনিয়েল মাৰ্শ্বেল ক্রিষ্টোফাৰৰ সৈতে বিয়া হোৱাৰ সপোন দেখিছিল। পিতৃ-মাতৃয়ে কন্যাৰ সেই সপোন পূৰ কৰাৰ কথা ভাবে।
এই কথা জনোৱা হ’ল প্ৰেমিক ডেনিয়েলৰ ঘৰত। ডেনিয়েলৰ লগতে তেওঁৰ পৰিয়ালেও মৃত্যুমুখী ছোৱালীজনীৰ সপোন পূৰ কৰিবৰ বাবে সমৰ্থন আগবঢ়ায়।
জোঁৱাই ডেনিয়েলক প্ৰশংসা কৰি এমাৰ মাতৃ এলিনাই কয় "ডেনিয়েল হৈছে আমি লগ পোৱা আটাইতকৈ সুন্দৰ আত্মাৰ গৰাকী। তেওঁৰ হৃদয়খন সোণৰ দৰে উজ্জ্বল আৰু তেওঁ সঁচাকৈয়ে এমাক ভাল পায়।"
দুখৰ খবৰ যে বিয়াৰ মাত্ৰ ১২ দিনৰ পাছতেই সকলোকে কন্দুৱায় নেদেখা দেশলৈ গুচি গ’ল এমা এডৱাৰ্ডছ।
একুইট লিম্ফোব্লাষ্টিক লিউকেমিয়া (ALL) হৈছে এক প্ৰকাৰৰ কেন্সাৰ যিয়ে তেজ আৰু হাড়ৰ মজ্জাক প্ৰভাৱিত কৰে। ই দ্ৰুত আৰু আক্ৰমণাত্মকভাৱে শৰীৰত বিয়পি পৰে আৰু ইয়াৰ বাবে তৎকালীন চিকিৎসাৰ প্ৰয়োজন হয়। প্ৰাপ্তবয়স্ক আৰু শিশু উভয়েই এই ৰোগত আক্ৰান্ত হ’ব পাৰে।
Continue Reading
