ডিজিটেল ডেস্কঃলোকক দেখি নিজেও কম খৰচত টাটু কৰাৰ কথা ভাবিছিল দুই যুৱক-যুৱতীয়ে৷ সেয়াই তেওঁলোকৰ বাবে কাল হ’ল৷ সস্তীয়া টাটু কৰি তেওঁলোকে দেহত চপাই ল’বলগীয়া হ’ল এইছআইভি৷ ঘটনাটো ঘটিছে বাৰানসীত৷
যোৱা দুমাহত বাৰাণসীৰ জিলা চিকিৎসালয়ৰ চিকিৎসকসকলে কমেও দুজন ৰোগী বিচাৰি পাইছে যিসকলৰ দেহত এইচআইভি পজিটিভ পোৱা গৈছে। শৰীৰত টাটু কৰাৰ পিছত তেওঁলোক এইছআইভিৰ দ্বাৰা সংক্ৰমিত হোৱা বুলি জনা গৈছে। ঘটনাটোৰ বিষয়ে গম পোৱাৰ পিছত কেন্দ্ৰীয় স্বাস্থ্য মন্ত্ৰালয় চিন্তিত হৈ পৰিছে।
বাৰাণসীৰ মুখ্য স্বাস্থ্য বিষয়াই নিশ্চিত কৰিছে যে জিলা চিকিৎসালয়ত চিকিৎসাধীন হৈ থকা দুজন ৰোগীৰ দেহত এইছআইভি ধৰা পৰিছে । তেওঁলোক দুয়োজনে দাবী কৰিছে যে এয়া অসুৰক্ষিত যৌন সম্ভোগ বা সংক্ৰমিত তেজৰ সংক্ৰমণৰ বাবে হোৱা নাই। তেওঁলোক দুয়োৱে শৰীৰত টাটু কৰিছিল আৰু টাটু কৰোতে ব্যৱহাৰ কৰা বেজীৰ পৰাই এইছআইভি তেওঁলোকৰ দেহলৈ আহিছে৷
জানিব পৰা গৈছে যে বাৰাণসীৰ বৰাগাঁৱৰ এজন ২০ বছৰীয়া যুৱকে গাঁৱত অনুষ্ঠিত মেলাত তেওঁৰ হাতত টাটু কৰাইছিল। কেইমাহমানৰ পিছত তেওঁৰ শাৰীৰিক অৱস্থাৰ অৱনতি ঘটিবলৈ ধৰে। তেওঁ ক্ৰমান্বয়ে দুৰ্বল হৈ পৰিছিল। জ্বৰ কমি যোৱা নাছিল। সকলো পৰীক্ষা কৰাৰ পিছত তেওঁৰ কোনো ৰোগ বিচাৰি নোপোৱাৰ বাবে তেওঁৰ এইছআইভি পৰীক্ষা কৰা হৈছিল৷ পৰীক্ষাৰ পিছত দেখা গৈছে যে তেওঁ এইচআইভি পজিটিভ। চিকিৎসকসকলেও ধাৰণা কৰিছে যে যুৱকজনৰ দেহলৈ এইছআইভি হাতৰ টাটুৰ জৰিয়তেই আহিছে৷
বাৰাণসীৰ এগৰাকী যুৱতীৰ সৈতে প্ৰায় একেই ঘটনা ঘটিছে। তেওঁ টাটুও কৰিছিল। তাৰ পিছত তেওঁ অসুস্থ হৈ পৰিল। যুৱতীগৰাকীৰ দেহতো এইছআইভি পোৱা গৈছে৷
ধাৰণা কৰা অনুসৰি টাটু কৰা লোকজনে সকলোৰে বাবে এটাই বেজী ব্যৱহাৰ কৰিছিল। পণ্ডিত দীনদয়াল উপাধ্যায় চিকিৎসালয়ৰ ডাঃ প্ৰীতি আগৰৱালৰ মতে, টাটু কৰিবলৈ ব্যৱহাৰ কৰা বেজীটো অতি ব্যয়বহুল। গতিকে খৰচ বচাবলৈ লোকজনে একেটা বেজীয়েই ব্যৱহাৰ কৰি সকলোৰে টাটু কৰিছিল।
চিকিৎসক প্ৰীতি আগৰৱালই সেয়ে এইবুলি পৰামৰ্শ দিছে যে টাটু কৰাৰ আগতে বেজীটো নতুন হয় নে নহয় সেয়া পৰীক্ষা কৰিব লাগিব।নহ’লে সামান্য অসাৱধনাৰ বাবেই শৰীৰত এইছআইভিৰ দৰে মাৰাত্ম বীজাণু বিয়পি পৰিব পাৰে৷
Continue Reading
