ডিজিটেল ডেস্ক: কালি সন্ধিয়া গুজৰাটৰ মৰবিত ব্ৰিটিছ যুগৰ এখন ওলমা দলং খহি পৰাৰ ফলত কমেও ১৩০গৰাকী লোকৰ মৃত্যু হৈছে৷ এতিয়ালৈকে প্ৰায় ১৭৭গৰাকী লোকক উদ্ধাৰ কৰা হৈছে আৰু আন কেইবাজনো লোকৰ সন্ধান চলি আছে বুলি উদ্ধাৰকাৰী বিষয়াসকলে সদৰী কৰিছে৷
ৰাজ্যখনৰ ৰাজধানী আহমেদাবাদৰ পৰা প্ৰায় ৩০০ কিলোমিটাৰ দূৰত অৱস্থিত দলংখন দেওবাৰে সন্ধিয়া ৬.৪২ বজাত খহি পৰে, যেতিয়া প্ৰায় ৫০০ৰো অধিক লোক ষঠ পূজাৰ বাবে কিছু ৰীতি-নীতি পালন কৰিবলৈ দলংখনৰ ওপৰত মিলিত হৈছিল৷
আৰু দুৰ্ঘটনা হোৱাৰ পাছতে এনডিআৰএফৰ পাঁচটা দল ঘটনাস্থলীত উপস্থিত হৈ উদ্ধাৰ অভিযান আৰম্ভ কৰে। পাছত সেনা, নৌ সেনা আৰু বায়ু সেনায়ো উদ্ধাৰ অভিযান আৰম্ভ কৰে৷ দুৰ্ঘটনাটোত গুৰুতৰভাৱে আঘাতপ্ৰাপ্ত প্ৰায় ১৯জন লোকক চিকিৎসালয়ত ভৰ্তি কৰোৱা হৈছে৷
ঘটনাস্থলীৰ ভিডিঅ’বোৰত দেখা গৈছিল যে দলংখন ছিঙি যোৱাৰ পাছত কিছুসংখ্যক লোক সুৰক্ষিত স্থানলৈ সাঁতুৰি আছিল। বহুতক দলংখনৰ ভঙা মূৰত লাগি থকা দেখা গৈছিল। মাচ্ছু নদীৰ ওপৰত থকা দলংখন নৱীকৰণৰ বাবে সাত মাহৰ বাবে বন্ধ আছিল। দলংখন গুজৰাটী নৱবৰ্ষৰ ২৬ অক্টোবৰত ৰাইজৰ বাবে পুনৰ মুকলি কৰা হয়।
গুজৰাটৰ মৰবি চহৰত খহি পৰা শতিকাপ্ৰাচীন দলংখনৰ পুনৰ্নিৰ্মাণকাৰীয়ে ইয়াক পুনৰ খোলাৰ আগতে কৰ্তৃপক্ষৰ পৰা ফিটনেছ প্ৰমাণপত্ৰ লোৱা নাছিল বুলি স্থানীয় পৌৰ নিগমৰ মুৰব্বী চেণ্ডিপচিন জালাই সদৰী কৰিছে৷
গুজৰাটৰ গৃহমন্ত্ৰী হৰ্ষ সংঘৱীয়ে কয় যে পাঁচজনীয়া উচ্চ ক্ষমতাসম্পন্ন সমিতিয়ে দলংখন খহি পৰাৰ তদন্ত কৰিব।
ৰাজ্য চৰকাৰে দুৰ্ঘটনাটোত মৃত্যু হোৱা লোকসকলৰ পৰিয়ালক ৪ লাখ টকাকৈ আৰু আহতসকলৰ বাবে ৫০,০০০ টকাকৈ ক্ষতিপূৰণ ঘোষণা কৰিছে৷ গুজৰাটত থকা প্ৰধানমন্ত্ৰী নৰেন্দ্ৰ মোদীয়েও পীড়িতসকলৰ পৰিয়ালৰ সদস্যসকলক ২ লাখকৈ আৰ্থিক অনুদান ঘোষণা কৰিছে।
Continue Reading
