সতৰ্কবাণী! আজিৰ ভিতৰতে ভাৰতীয়সকলে ত্যাগ কৰক ৰাজধানী কিয়েভ

ডিজিটেল ডেস্কঃ কেন্দ্ৰীয় চৰকাৰে ভাৰতীয় নাগৰিকসকলক কিয়েভ এৰি যাবলৈ জৰুৰী বাৰ্তা জাৰি কৰিছে। ইউক্ৰেইনৰ ৰাজধানী চহৰ মঙলবাৰে পুৱাৰে পৰা অধিক জটিল হৈ পৰিছে। পুৱাৰে পৰা ৰাজধানী চহৰখনত বোমা-বিস্ফোৰণৰ খবৰ পোৱা গৈছে। এইটোও খবৰ পোৱা গৈছে যে ৰাছিয়ান সেনাই ইতিমধ্যে কিয়েভ চহৰখন চাৰিওফালৰ পৰা আগুৰি লৈছে। এনে পৰিস্থিতিত, দিল্লীয়ে এতিয়া দেশৰ নাগৰিকসকলক কোনো প্ৰকাৰে তাত থাকিবলৈ দিবলৈ বিচৰা নাই। মোদী চৰকাৰে নিজাববীয়াকৈ ৰে’ল বা গাড়ী ভাৰা লৈ ৰাজধানী চহৰ কিয়েভ এৰি আন ঠাইলৈ যাবলৈ পৰামৰ্শ দিছে। ইফালে, ভাৰতে ইউক্ৰেইনৰ পৰা ভাৰতীয় শিক্ষাৰ্থীসকলক ঘূৰাই আনিবলৈ নিৰন্তৰভাৱে চেষ্টা অব্যাহত ৰাখিছে। আনহাতে, ইউক্ৰেইনৰ সংবাদ মাধ্যমৰ সূত্ৰ অনুসৰি, ৰাছিয়াৰ সৈন্যই আজি পুৱা কিয়েভৰ বাৰোডানকা অঞ্চলৰ সামৰিক পৰিক্ৰমা-মন্ত্ৰণালয়ৰ এটা পুনৰ্সংস্থাপন কেন্দ্ৰত আক্ৰমণ কৰে। উল্লেখ্য যে, ইউক্ৰেইন আৰু ৰাছিয়াৰ প্ৰতিনিধিসকলৰ মাজত সোমবাৰে বেলাৰুছৰ সীমান্তত আলোচনা মিলিত হৈছিল। প্ৰায় চাৰে তিনি ঘণ্টা ধৰি চলিছিল এই সভাখন। সূত্ৰ অনুসৰি, কিয়েভে তেওঁলোকৰ দেশৰ পৰা সৈন্য সম্পূৰ্ণৰূপে প্ৰত্যাহাৰ কৰাৰ দাবী জনাইছে। অৱশ্যে, মস্কোৱে সেই দাবী একেবাৰে গ্ৰহণ কৰিব নে নাই সেই কথা এতিয়াও স্পষ্ট হোৱা নাই। আলোচনা আৰম্ভ হোৱাৰ পাছতো ৰাছিয়াই ইউক্ৰেইনৰ ওপৰত আক্ৰমণ বন্ধ কৰা নাছিল। ইয়াৰ পৰিৱৰ্তে, তেওঁলোকে আলোচনা চলি থকা সময়ত ইউক্ৰেইনৰ ওপৰত আক্ৰমণ তীব্ৰতৰ কৰ তুলিছে। আজি পুৱাৰে পৰা ৰাজধানী কিয়েভৰ পৰিস্থিতিও যথেষ্ট উদ্বেগজনক হৈ পৰিছে। সমগ্ৰ চহৰখনতে প্ৰশাসনৰ ফালৰ পৰা হাই এলাৰ্ট জাৰি কৰিছে। যান-বাহন চলাচলো বৰ্তমান ব্যাহত হৈ পৰিছে। জৰুৰীকালীন সেৱাৰ সৈতে জড়িত গাড়ীবোৰো সঠিকভাৱে সেৱা প্ৰদান কৰিব পৰা নাই। বিশ্ব স্বাস্থ্য সংস্থাৰ দ্বাৰা শেহতীয়াকৈ এক বিবৃতিও জাৰি কৰা হৈছে আৰু কোৱা হয় যে- ‘ইউক্ৰেইনত অক্সিজেনৰ পৰিমাণ এই মুহূৰ্তত অতি সংকটজনক পৰিস্থিতিত আছে। অক্সিজেন প্লাণ্টৰ পৰা চিকিৎসালয়সমূহক সঠিকভাৱে অক্সিজেন যোগান ধৰাটো সম্ভৱ হৈ উঠা নাই। বিশ্ব স্বাস্থ্য সংস্থাৰ মহানিৰ্দেশক টেড্ৰোছ অধানম ঘেব্ৰেয়াছে এক বিবৃতিত কয় যে, ‘২৪ ঘণ্টাৰ ভিতৰত বেছিভাগ চিকিৎসালয়ত অক্সিজেন শেষ হ’ব। বহুতো চিকিৎসালয়ত ইতিমধ্যে অক্সিজেন শেষ হৈ গৈছে। ইয়াৰ ফলস্বৰূপে, এতিয়া হাজাৰ হাজাৰ লোকৰ জীৱনলৈ অনিশ্চয়তা আহি পৰিছে।’