সুৰা প্ৰেমীসকলৰ বাবে সুখবৰ! এতিয়া মেট্ৰ’ ষ্টেছনতে গ্ৰাহকে লাভ কৰিব সুৰাৰ বিপণী

ডিজিটেল ডেস্ক : সুৰা প্ৰেমীসকলৰ বাবে এক সুন্দৰ খবৰ। এতিয়াৰে পৰা মেট্ৰ’ ষ্টেছনতে উপলব্ধ হ’ব সুৰা। ৰাজহ সংগ্ৰহ বৃদ্ধি আৰু চাহিদা পূৰণৰ বাবে আবকাৰী বিভাগে গ্ৰহণ কৰিছে এক নতুন সিদ্ধান্ত। দিল্লীৰ ৬টা মেট্ৰ’ ষ্টেছনত সুৰাৰ দোকান খুলিবলৈ অনুমতি প্ৰদান কৰিছে। বিষয়াসকলে জনোৱা মতে, ঘন জনবসতিপূৰ্ণ অঞ্চলত চাহিদা পূৰণৰ বাবে এই পদক্ষেপ গ্ৰহণ কৰা হৈছে।

 দিল্লী কনজিউমাৰ্ছ ক’অপাৰেটিভ হোলচেল ষ্ট’ৰছ লিমিটেডক দিল্লী মেট্ৰ’ ৰে’ল নিগমে ৬টা মেট্ৰ’ ষ্টেছনত সুৰাৰ বিপণী খোলাৰ অনুমতি প্ৰদান কৰিছে। এই তালিকাত আছে বদৰাপুৰ, দ্বাৰকা, কৰলবাগ, ৰাজৌৰী গাৰ্ডেন, মুণ্ডকা আদি মেট্ৰ’ ষ্টেছন। প্ৰতিদিনে মেট্ৰ’ ষ্টেছনত বিপুলসংখ্যক যাত্ৰী থাকে, সেয়েহে অনুমান কৰা হৈছে যে এই অঞ্চলসমূহত সুৰাৰ বিপণীসমূহে বিপুল ৰাজহ আহৰণ কৰিব পাৰিব।

 ইতিমধ্যে দিল্লীৰ প্ৰধান মেট্ৰ’ ষ্টেছনসমূহত সুৰাৰ বিপণী মুকলি কৰা হৈছে। বাকীবোৰ শীঘ্ৰেই খোলাৰ সম্ভাৱনা আছে। আবকাৰী বিভাগৰ এজন বিষয়াই জনোৱা মতে, হুইস্কি আৰু ৰামৰ দোকানৰ উপৰি তেওঁলোকে কিছুমান দোকানৰ অনুজ্ঞাপত্ৰ দিবলৈ চেষ্টা কৰিছে য’ত কেৱল বিয়েৰ আৰু আন সুৰাহে উপলব্ধ হ’ব। ইয়াৰ উপৰি সুৰাৰ দোকানৰ সমান্তৰালকৈ আন সামগ্ৰীৰ বিপনীও খোলাৰ অনুমতি দিয়া হৈছে বুলি বিষয়াসকলে জনায়।

 বিষয়াগৰাকীয়ে লগতে কয় যে আমি চেষ্টা কৰিছো আছো প্ৰতিখন দোকান কমেও ৩০০ বৰ্গফুট হ’ব লাগে। কিন্তু ঠাইৰ অভাৱত কেইবাখনো সৰু সৰু দোকানো অনুমতি দিবলগীয়া হৈছিল। ছেপ্টেম্বৰৰ ভিতৰত সমগ্ৰ মহানগৰীত ৫০০খন সুৰাৰ দোকান খোলাৰ লক্ষ্য লৈছে আবকাৰী বিভাগে। ২০২২ চনৰ ভিতৰত কমেও ২০০খন সুৰাৰ দোকান খোলাৰ মনস্থ কৰিছে আবকাৰী বিভাগে।