সুস্মিতা সেনৰ কন্যাৰ জন্মদিন, প্ৰাক্তন প্ৰেমিকে শ্বেয়াৰ কৰিলে ফটো

ডিজিটেল ডেস্ক: বলীউডৰ মোহময়ী অভিনেত্ৰী সুস্মিতা সেন। এই পৰ্যন্ত বিবাহপাশত আবদ্ধ নহ’লেও সুস্মিতাৰ আছে ৩টাকৈ সন্তান। আজি আছিল সুস্মিতাৰ কন্যাৰ আলিশাৰ জন্মদিন। কণমানি আলিশাই ভৰি দিলে ১৩ বছৰ বয়সত।

কন্যাৰ জন্মদিন উপলক্ষে সুস্মিতাই ইণ্টাগ্ৰামত দিলে এটা মৰমলগা প’ষ্ট। প’ষ্টটোত তেওঁ লিখে, "মোৰ প্ৰেমৰ ১৩ সংখ্যক জন্মদিনৰ শুভেচ্ছা জনালো। আলিশা মানে মহান, যিজনক ভগৱানে ৰক্ষা কৰে। আলিশা মানেই ভগৱানৰ উপহাৰ। তুমি সঁচাকৈয়ে মোৰ বাবে ভগৱানৰ উপহাৰতকৈ কোনো গুণে কম নহয়। মই তেওঁৰ চকুত, তেওঁৰ বিশ্বাসত আৰু আটাইতকৈ গুৰুত্বপূৰ্ণ কথাটো হ’ল তেওঁৰ কামত প্ৰেমৰ ঐশ্বৰিকতাৰ বিশুদ্ধতা আৰু শক্তি দেখিছো। মই এগৰাকী ভাল মানুহ কাৰণ মই আলিশাৰ মাক। সদায় সুস্থ আৰু সুখী হৈ থাকা। তোমাৰ বা আৰু মই তোমাক বহুত ভালপাওঁ।"

নিশ্চিতভাৱেই সুস্মিতা সেনৰ এই প’ষ্টে নেটিজেনক আকৰ্ষণ কৰিছে। কিন্তু তাৰ সমান্তৰালভাৱে আন এটা প’ষ্টে দৃষ্টি আকৰ্ষণ কৰিছে সকলোৰে। আলিশাৰ জন্মদিন উপলক্ষে সেই প’ষ্টটো লিখিছে সুস্মিতা সেনৰ প্ৰাক্তন প্ৰেমিকে। প্ৰাক্তন প্ৰেমিক ৰোহমনে আলিশাৰ সৈতে এখন ফটো শ্বেয়াৰ কৰি জন্মদিনৰ শুভেচ্ছা জনায়।

উল্লেখযোগ্য যে, কিছুদিন পূৰ্বে ৰোহমনৰ সৈতে সম্পৰ্ক চিঙি ললিত মোডীৰ সৈতে নতুন সম্পৰ্ক স্থাপন কৰিছিল সুস্মিতাই। এই খবৰে তোলপাৰ লগাইছিল সকলোতে। পিছে ৰোহমনৰ সৈতে প্ৰেমৰ সম্পৰ্কত নাথাকিলেও এতিয়াও বন্ধুত্ব ধৰি ৰাখিছে বলীউডৰ মোহময়ী অভিনেত্ৰীগৰাকীয়ে।