শুভ জন্মদিন কিৰণ বেদীঃ দেশৰ এই দুৰ্দান্ত সাহসী কন্যাৰ পৰা লওঁ আহক জীৱনৰ পাঠ

অমৃতসৰৰ ছেক্ৰেড হাৰ্ট কনভেণ্ট স্কুলৰ পৰা পঢ়া-শুনা কৰি কিৰণ বেদীয়ে এনচিচিত যোগদান কৰে। ইয়াৰ পিছত তেওঁ ইংৰাজীত বি এ অনাৰ্ছ কৰিছিল। পঞ্জাৱ বিশ্ববিদ্যালয়ৰ পৰা ৰাজনীতি বিজ্ঞানত এম এ কৰিছিল মেধাৱী ছাত্ৰী কিৰণ বেদীয়ে। ইয়াৰ উপৰি তেওঁ দিল্লী বিশ্ববিদ্যালয়ৰ পৰা আইন বিষয়তো অধ্যয়ন কৰিছিল। টেনিছ খেলি ভাল পাইছিল কিৰণ বেদীয়ে। 

পিতৃৰ পৰা অনুপ্ৰাণিত হৈ বেদীয়ে ন বছৰ বয়সতে টেনিছ খেলিবলৈ আৰম্ভ কৰে। ১৯৬৬ চনত ৰাষ্ট্ৰীয় জুনিয়ৰ টেনিছ চেম্পিয়নো হয় তেওঁ। ৰাষ্ট্ৰীয় চেম্পিয়ন হিচাপে উইম্বলডন জুনিয়ৰ চেম্পিয়নশ্বিপত প্ৰৱেশৰ বাবে যোগ্য প্ৰতিযোগী আছিল কিৰণ বেদী, কিন্তু ভাৰতীয় প্ৰশাসনে তেওঁক মনোনীত কৰা নাছিল। ১৯৬৫ চনৰ পৰা ১৯৭৮ চনৰ ভিতৰত কিৰণ বেদীয়ে বহুতো ৰাজ্যিক আৰু ৰাষ্ট্ৰীয় পৰ্যায়ৰ খিতাপ দখলেৰে সকলোৰে দৃষ্টি কাঢ়িছিল।

ভাৰতৰ প্ৰথমগৰাকী মহিলা আই পি এছ বিষয়া হোৱাৰ পিছত কিৰণ বেদীয়ে দিল্লী, গোৱা, চণ্ডীগড় আৰু মিজোৰামত অভূতপূৰ্ব সেৱা আগবঢ়ায়। ১৯৭৯ চনত তেওঁৰ অসাধাৰণ সেৱাৰ বাবে ৰাষ্ট্ৰপতি আৰক্ষী পদক প্ৰদান কৰা হয়। এগৰাকী অতি শৃংখলাবদ্ধ আৰু কঠোৰ বিষয়া হিচাপে সুনাম আছে তেওঁৰ। কিৰণ বেদীক পশ্চিম দিল্লীলৈ স্থানান্তৰ কৰাৰ পাছত মহিলাৰ বিৰুদ্ধে অপৰাধমূলক কাৰ্য ব্যাপক হাৰত হ্ৰাস পাইছিল। ১৯৮২ চনৰ এছিয়ান গেমছৰ সময়ত কিৰণ বেদীয়ে যান-বাহন ব্যৱস্থাৰ নিৰীক্ষণৰ দায়িত্ব গ্ৰহণ কৰিছিল। দিল্লীৰ ডিচিপি হৈ থকাৰ সময়তে তেওঁ ড্ৰাগছৰ অপব্যৱহাৰৰ বিৰুদ্ধে প্ৰচাৰ চলাইছিল, যিটো পৰৱৰ্তী সময়ত নৱজ্যোতি দিল্লী পুলিচ ফাউণ্ডেশ্যনলৈ ৰূপান্তৰিত হৈছিল। ইয়াৰোপৰি তেওঁ দৰিদ্ৰ লোকৰ জীৱন উন্নত কৰাৰ বাবে ‘ইণ্ডিয়া ভিজন ফাউণ্ডেশ্যনো’ প্ৰতিষ্ঠা কৰিছিল। 

২৮ মে’ ২০১৬ৰ পৰা ১৬ ফেব্ৰুৱাৰী ২০২১লৈকে পুডুচেৰীৰ লেফটেনেণ্ট গৱৰ্ণৰ হিচাপে তেওঁ নিজৰ দায়িত্ব পালন কৰিছিল। এখেত ভাৰতীয় দূৰদৰ্শনৰ জনপ্ৰিয় ধাৰাবাহিক আপ কি কচহৰি-ৰ আঁতধৰোতা তথা বিচাৰক আছিল। বিভিন্ন বঁটাৰে সন্মানিত হৈছে কিৰণ বেদীৰ জীৱন। তাৰ ভিতৰত অন্যতম ৰমন মেগছেছে বঁটা, ভাৰতীয় মানৱতা বিকাশ পুৰস্কাৰ, মষ্ট এডমাইৰড ইণ্ডিয়ান ফিমেল আইকন, ৱ’মেন এক্সচিলেন্স এৱাৰ্ডছ, লাইফটাইম এচিভমেণ্ট এৱাৰ্ডছ, ভাৰত গৌৰৱ আদি।

স্বাভাৱিকতে, কিৰণ বেদীৰ জীৱনৰ এই সোণোৱালী যাত্ৰা সমাজৰ বাবে হ’ব পাৰে আদৰ্শৰ আদিপাঠ।