ডিজিটেল ডেস্কঃ প্ৰকৃত প্ৰেমৰ বহু উদাহৰণ আমাৰ সমাজত দেখিবলৈ পোৱা যায়। এজন ব্যক্তিয়ে প্ৰেমৰ বাবে যিকোনো পৰিসৰলৈ যাব পাৰে। তেনে এটা কাহিনী চৰ্চালৈ আহিছে য’ত এগৰাকী মহিলাই নিজৰ অসুস্থ স্বামীৰ বাবে যুঁজি আছে। এই মহিলাগৰাকীয়ে তেওঁৰ ঔষধৰ বাবে ধন সংগ্ৰহ কৰিবলৈ নামি পৰিছে জীৱন যুদ্ধত। মহিলাগৰাকীয়ে সন্তানৰ সৈতে বিক্ৰী কৰি আছে মোমো ।
এই ঘটনা চীনৰ এখন চহৰৰ। সংবাদ মাধ্যমৰ খবৰ অনুসৰি মহিলাগৰাকীৰ নাম নি। ২০১৬ চনত বিবাহপাশত আবদ্ধ হোৱা মহিলাগৰাকীৰ দুটা সন্তান আছে। ৩ মাহ পূৰ্বে তেওঁৰ স্বামীৰ গাড়ী দুৰ্ঘটনা হৈছিল, তাৰ পিছত তেওঁ চিকিৎসালয়ত ভৰ্তি হৈছিল আৰু স্বাস্থ্যৰ অৱনতি ঘটাৰ পিছত তেওঁ ক’মাত আছে। মহিলাগৰাকীয়ে তেওঁৰ চিকিৎসাৰ বাবে নিজৰ ঘৰ বিক্ৰী কৰিছিল যদিও চিকিৎসা সম্পূৰ্ণ নহ’ল।
মহিলাগৰাকীয়ে বৰ্তমান হাস্পতালৰ বাহিৰত মোমো বিক্ৰী কৰিবলৈ আৰম্ভ কৰিছে। স্বামীৰ বাবে তিনিটা অপাৰেচন কৰা হৈছে আৰু ইয়াত বহু টকা খৰচ হৈছে। তেওঁ নিজৰ দোকানৰ পৰা টকা উপাৰ্জন কৰি ঘৰখন চলায়। শেহতীয়াকৈ তেওঁৰ কাহিনী ভাইৰেল হৈছে। মহিলাগৰাকীয়ে কয় যে যিমানেই অসুবিধা নহওক কিয় মই মোৰ পৰিয়ালটোৰ কাৰণে সকলো কৰিম। মই তেওঁলোকক বহুত ভাল পাওঁ। কঠোৰ পৰিশ্ৰম কৰি মই তেওঁলোকক ৰক্ষা কৰিম।
মহিলাগৰাকীয়ে কয় যে ''মই তেওঁৰ উভতি অহা বাবে অপেক্ষা কৰি আছো। এবছৰ, দুবছৰ, তিনি বছৰ বা বহু বছৰ অপেক্ষা কৰিব লাগিব, মই কৰি যাম।'' উল্লেখ্য যে মহিলাগৰাকীৰ স্বামীৰ অৱস্থা ইতিমধ্যে উন্নত হৈছে। চিকিৎসকে অতি সোনকালে ক’মাৰ পৰা ওলাই অহাৰ আশা প্ৰকাশ কৰিছে। বৰ্তমান সময়ত ছ’চিয়েল মিডিয়াত এই মহিলাগৰাকীক নেটিজেনসকলে উচ্চ প্ৰশংসা কৰি আছে।
Continue Reading
