অভিশপ্ত ৩ জানুৱাৰী! ইৰাণৰ দুটাকৈ বোমা বিস্ফোৰণত ১০৩ জন লোক নিহত

স্থানীয় সংবাদ মাধ্যম ইছলামিক ৰিপাব্লিক অৱ ইৰাণ ব্ৰডকাষ্টিঙৰ উদ্ধৃতিৰে নিউজ এজেন্সী এ পিয়ে জনোৱা মতে, ইৰাণৰ দক্ষিণ অঞ্চলৰ কেৰমান চহৰৰ চাহেব আল জামান মছজিদৰ ওচৰত শোভাযাত্ৰাক লক্ষ্য কৰি বিস্ফোৰণৰ সময়ত প্ৰায় ১৭০ জন লোক আহত হয়। ব্ৰিটিছ সংবাদ মাধ্যমৰ ৱেবছাইট বিবিচিয়ে প্ৰকাশ কৰা অনুসৰি কেৰমানৰ ডেপুটি গৱৰ্ণৰে এই কাণ্ডক “সন্ত্রাসবাদী আক্ৰমণ” বুলি অভিহিত কৰিছে।

অনলাইনত শ্বেয়াৰ কৰা ভিডিঅ’ত দেখা গৈছে যে কেইবাটাও মৃতদেহ এটা পথৰ দুয়োপাৰে বিয়পি আছে। এ পিৰ মতে, প্ৰথমটো বিস্ফোৰণৰ ১৫ মিনিটৰ ভিতৰতে দ্বিতীয়টো বিস্ফোৰণ সংঘটিত হৈছিল, ইয়াৰ পৰা বুজা যায় যে প্ৰাৰম্ভিক বিস্ফোৰণৰ প্ৰতি সঁহাৰি জনোৱা উদ্ধাৰ আৰু নিৰাপত্তাৰক্ষীক লক্ষ্য কৰি দ্বিতীয়টো বোমা বিস্ফোৰণ সংঘটিত হয়৷

বুধবাৰে জেনেৰেল ছলেমানীক সমবেদনা জনোৱাৰ বাবে শতাধিক লোকে শোভাযাত্ৰাত অংশগ্ৰহণ কৰাৰ সময়তে এই ঘটনা সংঘটিত হয়। উল্লেখ্য যে ছলেমানীৰ ২০২০ চনত চুবুৰীয়া ৰাষ্ট্ৰ ইৰাকত আমেৰিকাৰ ড্ৰোন আক্ৰমণত নিহত হৈছিল।ইৰাণত জেনেৰেল ছলেমানীয়ে গুৰুত্বপূৰ্ণ পদবীত অধিষ্ঠিত হৈছিল আৰু তেওঁক সৰ্বোচ্চ নেতা আয়াতুল্লাহ আলী খামেনেইৰ পিছত আটাইতকৈ প্ৰভাৱশালী ব্যক্তি হিচাপে গণ্য কৰা হৈছিল। ৰিভল্যুচনেৰী গাৰ্ডৰ বহিঃৰাষ্ট্ৰৰ অভিযান শাখা কুদছ বাহিনীৰ অধিনায়ক হিচাপে ছলেমানীয়ে সমগ্ৰ অঞ্চলটোত ইৰাণৰ নীতি গঢ় দিয়াত গুৰুত্বপূৰ্ণ ভূমিকা পালন কৰিছিল।তেওঁৰ দায়িত্বৰ ভিতৰত আছিল কুদছ বাহিনীৰ গোপন অভিযান চোৱাচিতা কৰা আৰু মিত্ৰ চৰকাৰ আৰু হামাছ আৰু হিজবুল্লাহৰ দৰে সশস্ত্ৰ গোটসমূহক কৌশলগত দিশ, পুঁজি, অস্ত্ৰ-শস্ত্ৰ, চোৰাংচোৱা, আৰু লজিষ্টিক সহায় আগবঢ়োৱা।

২০২০ চনত তেতিয়াৰ আমেৰিকাৰ ৰাষ্ট্ৰপতি ড’নাল্ড ট্ৰাম্পৰ নিৰ্দেশত ছলেমানীক “বিশ্বৰ যিকোনো ঠাইতে এক নম্বৰ সন্ত্ৰাসবাদী” বুলি অভিহিত কৰা হয়।