শ্বিনা বৰা হত্যাকাণ্ডৰ নতুন পাক! এইবাৰ হেৰাল ৰায়গড়ৰ হাবিৰ পৰা আৰক্ষীয়ে উদ্ধাৰ কৰা শ্বিনা বৰাৰ হাড়, তদন্তত আউল লগাৰ আশংকা

ফৰেনছিক বিশেষজ্ঞগৰাকীয়ে ২০১২ চনত আৰক্ষীয়ে উদ্ধাৰ কৰা হাড়সমূহ প্ৰথমে পৰীক্ষা কৰিছিল। সেই বছৰতে শ্বিনা বৰাক হত্যা কৰা হৈছিল।চৰকাৰী অধিবক্তা চি জে নন্দোডে আদালতত কয় যে সাক্ষী ফৰেনছিক বিশেষজ্ঞ ডাঃ জেবা খানে পৰীক্ষা কৰা হাড় আৰু অৱশিষ্টসমূহ এতিয়া বিচাৰি পোৱা হোৱা নাই৷ সেইবোৰৰ সন্ধান চলি আছে  যদিও সেইবোৰ পোৱা নগ’ল।অৱশ্যে হাড়সমূহ প্ৰমাণ হিচাপে দাখিল নকৰাকৈয়ে ডাঃ খানৰ সাক্ষ্য আগবঢ়াই নিবলৈ তদন্তকাৰী সংস্থা  সাজু বুলি জানিব পৰা গৈছে।

কি আছিল শ্বিনা বৰা হত্যাকাণ্ড?

শ্বিনা বৰা হত্যাকাণ্ডৰ বিষয়টো ২০১৫ চনত প্ৰথমবাৰৰ বাবে পোহৰলৈ আহিছিল। অভিযোগ অনুসৰি ২০১২ চনৰ ২৪ এপ্ৰিলত শ্বিনাৰ মাতৃ  ইন্দ্ৰানী মুখাৰ্জীয়ে  সঞ্জীৱ খান্না আৰু শ্যামবীৰ ৰায়ৰ সহায়ত ২৪ বছৰীয়া শ্বিনা বৰাক হত্যা কৰিছিল। ৰায়গড় অঞ্চলৰ অৰণ্যত উদ্ধাৰ হৈছিল শ্বিনাৰ মৃতদেহ। ২০১৫ চনত ৩ বছৰৰ পিছত এই তথ্য লাভ কৰিছিল আৰক্ষীয়ে। তাৰ পিছত ৪ জনৰ বিৰুদ্ধে গোচৰ ৰুজু কৰা হৈছিল৷  এই ৪ অভিযুক্তৰ ভিতৰত ইন্দ্ৰাণী মুখাৰ্জী আৰু তেওঁৰ স্বামী পিটাৰ মুখাৰ্জীৰ নামো আছে। পিটাৰ মুখাৰ্জী ইন্দ্ৰানীৰ দ্বিতীয় স্বামী। শ্বিনা বৰা পিটাৰৰ ছোৱালী নাছিল। অৱশ্যে ইন্দ্ৰাণী মুখাৰ্জীৰ বিৰুদ্ধে প্ৰথম বিবাহৰ খবৰ লুকুৱাই ৰখাৰ অভিযোগ উত্থাপন হৈছিল৷ মানুহৰ আগত ইন্দ্ৰানীয়ে তেওঁৰ কন্যা শ্বিনা বৰাক সৰু ভনীয়েক বুলিহে পৰিচয় কৰাই দিছিল৷  শ্বিনা বৰা হত্যাকাণ্ডৰ গোচৰটো চিবিআই-এ তদন্ত কৰি আছে৷ কিন্তু কি কাৰণত শ্বিনা বৰাক হত্যা কৰা হৈছিল সেয়া আজিও স্পষ্ট হোৱা নাই৷