ডিজিটেল ডেস্কঃ ১৯৯৭ চনত মুক্তি পোৱা ‘টাইটানিক’ ছবিখনে এতিয়াও মানুহক আৱেগিক কৰি তুলে। এই ছবিখন টাইটানিক জাহাজ ডুব যোৱাৰ বাস্তৱ ঘটনাৰ আধাৰত নিৰ্মাণ কৰা এখন ছবি, য’ত প্ৰায় ১৫০০ লোকে প্ৰাণ হেৰুৱাইছিল।
১৯১২ চনৰ ১৫ এপ্ৰিলত এই জাহাজখন দুৰ্ঘটনাগ্ৰস্ত হৈছিল কিন্তু ইয়াৰ ভগ্নাংশ আজিও উত্তৰ আটলাণ্টিক মহাসাগৰত পোৱা যায়। এই ছবিখনত পিন্ধা ২টা ৰ’লেক্স ঘড়ী এতিয়া নিলাম হোৱাৰ পথত ।
এই ঘড়ী দুটা কেতিয়া আৰু ক’ত নিলাম কৰা হ’ব?
‘টাইটানিক’ ছবিখনৰ সৈতে জড়িত এই ঘড়ীবোৰৰ নিলাম আমেৰিকাৰ নিউয়ৰ্কত অনুষ্ঠিত হ’ব। ৬ ডিচেম্বৰত অনুষ্ঠিত হ’বলগীয়া এই নিলাম ছ’থেবিজ নামৰ নিলাম ঘৰটোৱে পৰিচালনা কৰিব ৷এই নিলামৰ নাম দিয়া হৈছে ‘জৰুৰী ঘড়ী’। এই দুয়োটা অনন্য ৰ’লেক্স ঘড়ী আলফ্ৰেড আল গিডিংছ নামৰ এজন ব্যক্তিৰ, তেওঁ কেইবাবাৰো টাইটানিকৰ ধ্বংসাৱশেষ বিচাৰি গৈছে। এই ঘড়ীবোৰৰ আনুমানিক মূল্য ১৬ৰ পৰা ৩৩ লাখ টকাৰ ভিতৰত।
১৯১২ চনত ডুব যোৱাৰ পিছত ১৯৮৫ চনৰ ১ ছেপ্টেম্বৰত প্ৰথমবাৰৰ বাবে টাইটানিক জাহাজৰ ধ্বংসাৱশেষ উদ্ধাৰ কৰা হৈছিল। ধ্বংসাৱশেষৰ পিছৰে পৰা ২৫০ জনতকৈও কম লোকে এই ঠাইখন নিজ চকুৰে দেখিছে, গিডিংছ আছিল ইয়াৰ ভিতৰত অন্যতম। গিডিংছ আছিল এজন আন্ডাৰ ৱাটাৰ চিনেমাট’গ্ৰাফাৰ, টাইটানিক ছবিখনৰ কামৰ বাবে তেওঁ বেছিকৈ পৰিচিত। টাইটানিক ছবিখনৰ সহ-প্ৰযোজকও আছিল তেওঁ।
এই ঘড়ী দুটাৰ ভিতৰত এটা হৈছে ষ্টীলৰ Ref 1680 Submariner, যিটো গিডিংছে ধ্বংসাৱশেষ বিচাৰি থাকোঁতে পিন্ধিছিল। দ্বিতীয় ঘড়ীটো হৈছে সোণৰ Ref 1680 Submariner, যিটো টাইটানিক চিনেমাত অভিনেতা বিল পেক্সটনে পিন্ধিছিল। ছবিখনত পেক্সটনে টাইটানিকৰ আৱিষ্কাৰক ব্ৰক লভেটৰ চৰিত্ৰত অভিনয় কৰিছিল। অৱশ্যে এই দুয়োটা ঘড়ী গিডিংছৰ ব্যক্তিগত সংগ্ৰহৰ অংশ আছিল।
ছ’থেবিজৰ এক প্ৰেছ বিজ্ঞপ্তিত কোৱা হৈছে যে, “গিডিংছে এক অসাধাৰণ জীৱন যাপন কৰিছিল, যিটো অভিজ্ঞতাৰ বিষয় সাধাৰণ মানুহে সপোনতো নাভাবে ।৫০ বছৰ ধৰি এই ঘড়ীবোৰে গিডিংছৰ সৈতে সমগ্ৰ বিশ্ব ভ্ৰমণ কৰি আহিছে। এই ঘড়ীবোৰ উত্তৰ মেৰুৰ বৰফৰ পথাৰবোৰৰ পৰা সাগৰৰ গভীৰতালৈকে গৈছে। বিশেষকৈ ষ্টীলৰ মডেলবোৰ, যিবোৰে হাজাৰ হাজাৰ ঘণ্টা পানীৰ তলত সোমাই থাকে।"
Continue Reading
