ডিজিটেল ডেস্কঃ এগৰাকী ট্ৰাক চালকৰ টোপনিয়ে হল কাল। এই টোপনিয়ে প্ৰাণ কাঢ়িলে ৫জনকৈ লোকৰ। চিমেণ্টৰ বেগ কঢ়িয়াই অনা এখন ট্ৰাকৰ খুন্দাত ৫জন লোকে প্ৰাণ হেৰুৱাইছে।
তামিলনাডুত সংঘটিত হৈছে এক শোকাৱহ দুৰ্ঘটনা। এই ঘটনা সংঘটিত হৈছে ৰাজ্যখনৰ পুডুক্কোট্টাই জিলাত। দুৰ্ঘটনা সংঘটিত কৰা ট্ৰাকখন আৰিয়ালুৰৰ পৰা শিৱগংগাইলৈ গৈ আছিল বুলি আৰক্ষীয়ে লগতে জানিবলৈ দিয়ে।
এই দুৰ্ঘটনাত ১৯জন লোক গুৰুতৰভাৱে আহত হৈছে। শনিবাৰে পুৱতি নিশা সংঘটিত হয় এই দুৰ্ঘটনা। নিয়ন্ত্ৰণহীন ট্ৰাকখনে খুন্দা মাৰে পথৰ কাষৰ এখন চাহৰ দোকানৰ লগতে ৰখাই থোৱা কেইখনমান বাহনত।
সেইসময়ত দোকানখনত চাহ খাই আছিল সবৰীমালা মন্দিৰ দৰ্শনৰ উদ্দেশ্যে যাত্ৰা কৰা কেইবাজনো তীৰ্থযাত্ৰীয়ে।
ট্ৰাকখনৰ খুন্দাত চাহ খাই থকা অৱস্থাতে পাঁচজন লোকৰ মৃত্যু হয় আৰু প্ৰায় ১৯জন লোক আহত হয়। এই দুৰ্ঘটনাত চাহ দোকানখনৰ সমীপতে ৰখাই থোৱা এখন গাড়ী আৰু আন দুচকীয়া বাহনৰো ক্ষতিসাধন হয়।
প্ৰাথমিক তদন্তৰ ভিত্তিত আৰক্ষীয়ে সদৰী কৰা মতে, ট্ৰাকখনৰ চালকজনে গাড়ী চলাই থকাৰ সময়তে টোপনি যোৱাৰ ফলত নিয়ন্ত্ৰণ হেৰাইছিল ট্ৰাকখনে।
Continue Reading
