ডিজিটেল ডেস্কঃ পাকিস্তান আশ্ৰয় লোৱা বাবে গুলীয়াই হত্যা কৰা হল এগৰাকী জনপ্ৰিয় আফগান গায়িকাক। তালিবানে আফগানিস্তান দখল কৰাত প্ৰাণৰ মমতাত প্ৰতিবেশী দেশ পাকিস্তানত আশ্ৰয় লৈছিল জনপ্ৰিয় কণ্ঠশিল্পী হাছিবা নূৰীয়ে। পাকিস্তানত আশ্ৰয় লোৱাটোৱেই কাল হ’ল হাছিবা নূৰীৰ। তেওঁক গুলীয়াই হত্যা কৰিলে তালিবানীয়ে। ঘটনাৰ পিছতে সমগ্ৰ পাকিস্তানতে উত্তেজনাৰ সৃষ্টি হৈছে। পাক আৰক্ষীয়ে ঘটনাস্থলীত উপস্থিত হৈ কণ্ঠশিল্পীগৰাকীৰ মৃতদেহ উদ্ধাৰ কৰি মৰণোত্তৰ পৰীক্ষাৰ বাবে প্ৰেৰণ কৰে।
উল্লেখ্য, ২০২১ চনত হাছিবা তালিবানৰ পৰা পলায়ন কৰি পাকিস্তানলৈ আহিছিল। তেতিয়াৰ পৰা তেওঁ পাকিস্তানৰ পেছাৱৰত আছিল। তাতেই অচিনাক্ত দুৰ্বৃত্তই গায়িকাগৰাকীক গুলীয়াই হত্যা কৰে।
পাকিস্তানত আশ্ৰয় লৈ হাছিবা নূৰীয়ে আফগানিস্তানৰ তালিবান শাসনৰ বিৰুদ্ধে মাত মাতি আহিছিল। আনকি তেওঁ কেইবাবাৰো আফগানী নাৰীয়ে সন্মুখীন হোৱা দুখ-দুৰ্দশাৰ কথা কৈছিল। লগতে মুক্তকণ্ঠে কৈছিল যে তালিবানে কেনেকৈ নাৰীক অত্যাচাৰ কৰি আছে। তালিবানৰ বিৰুদ্ধে মাত মাতি অহাৰ বাবেই গায়িকাগৰাকীক হত্যা কৰা হল বুলি সন্দেহ প্ৰকাশ কৰা হৈছে।
গায়িকাগৰাকীক গুলীয়াই হত্যা কৰাৰ পাছতে তেওঁৰ অনুৰাগীসকল শোকত ম্ৰিয়মাণ হৈ পৰিছে। এই বাতৰি বিয়পি পৰাৰ লগে লগে সমগ্ৰে বিশ্বতে তীব্ৰ চাঞ্চল্যৰ সৃষ্টি হৈছে।
Continue Reading
