ডিজিটেল ডেস্কঃ এগৰাকী মুছলমান মহিলা সীমা হাইদৰে ভাৰতৰ এজন হিন্দু যুৱকৰ প্ৰেমত পৰাৰ পিছত পাকিস্তানৰ পৰা ভাৰতলৈ পলাই অহাৰ ঘটনাই এতিয়া দুয়ো খন দেশৰ মাজত উত্তেজনা বৃদ্ধি কৰিছে। মহিলাগৰাকীয়ে ভাৰতত থকাৰ প্ৰতিশোধ স্বৰূপে পাকিস্তানৰ এটা হিন্দু মন্দিৰত ৰকেট লঞ্চাৰেৰে আক্ৰমণ কৰাৰ ঘটনা ঘটিছে।
জানিব পৰা মতে দুৰ্বৃত্তই মন্দিৰৰ কাষতে থকা হিন্দুসকলৰ ঘৰত প্ৰৱেশ কৰিছিল আৰু গুলীচালনা কৰিছিল। অৱশ্যে ঘটনাটোত কোনো লোক হতাহত হোৱাৰ খবৰ পোৱা হোৱা নাই। সিন্ধু প্ৰদেশত সংঘটিত ঘটনাটোৱে আকৌ এবাৰ পাকিস্তানত ধৰ্মীয় সংখ্যালঘুসকলৰ সুৰক্ষা সম্পৰ্কে প্ৰশ্ন উত্থাপন কৰিছে। উল্লেখ্য কিছুদিন পূৰ্বে কৰাচীৰ এটা ১৫০ বছৰ পুৰণি মন্দিৰ এটা শ্বপিং মল নিৰ্মাণৰ বাবে ভাঙি পেলোৱা হৈছিল।
মন্দিৰত ৰকেট লঞ্চাৰেৰে আক্ৰমণ কৰাৰ ঘটনাটো দেওবাৰে পুৱতি নিশা সংঘটিত হৈছে। সিন্ধু প্ৰদেশৰ দক্ষিণে থকা কাশমোৰ অঞ্চলত অৱস্থিত মন্দিৰটো বছৰত কেৱল এবাৰহে খোলা হয়। মন্দিৰটো গোটেই বছৰটো বন্ধ হৈ থাকে। মন্দিৰটো দেওবাৰেও বন্ধ আছিল। তেতিয়াই দুৰ্বৃত্তই ৰকেট লঞ্চাৰেৰে মন্দিৰটো আক্ৰমণ কৰে।
৮-৯ জনীয়া দুৰ্বৃত্তৰ এটা দলে মন্দিৰৰ কাষত থকা হিন্দু লোকসকলৰ ঘৰতো আক্ৰমণ কৰিছিল।আক্ৰমণৰ খবৰ পোৱাৰ পিছত কাশমোৰ-কান্ধকোটৰ এছএছপি ইৰফান চাম্মোৰ নেতৃত্বত এটা বৃহৎ আৰক্ষী বাহিনী ঘটনাস্থলীত উপস্থিত হয়। আৰক্ষীৰ প্ৰকাশ কৰা মতে নিক্ষেপ কৰা ৰকেট লঞ্চাৰৰ বিস্ফোৰণ নঘটিল। সেয়ে হিন্দু মন্দিৰটো অক্ষত অৱস্থাতে ৰয়। স্থানীয় হিন্দু লোকসকলৰ সুৰক্ষা নিশ্চিত কৰিবলৈ এক বৃহৎ আৰক্ষী বাহিনী মোতায়েন কৰা হৈছে।
আৰক্ষীৰ প্ৰকাশ কৰা মতে পাকিস্তানী মহিলাগৰাকীক ভাৰতে ওভতাই নিদিয়াৰ বাবেই এনে আক্ৰমণ ঘটিব পাৰে। ঘটনাটোক লৈ দুয়োখন দেশৰ মাজত বিবাদ চলি আছে। ইয়াৰ পিছতে কাশমোৰৰ হিন্দু জনতাক ভাবুকি দিয়া হৈছিল। মন্দিৰটো ভাঙি পেলোৱাৰ উপৰিস্থানীয় হিন্দুসকলে মৃত্যুৰ ভাবুকি লাভ কৰিছিল।
Continue Reading
