ডিজিটেল ডেস্কঃ এদিনীয়া বিশ্বকাপ ২০২৩ৰ পূৰ্বে বৃহৎ সমস্যাৰ সন্মুখীন হৈছে পাকিস্তান ক্ৰিকেট দল। খবৰ অনুসৰি বিগত চাৰি মাহ ধৰি পাকিস্তানী খেলুৱৈয়ে দৰমহা লাভ কৰা নাই। দৰমহা নিদিয়াৰ বাবে দলীয় খেলুৱৈসকলে বিশ্বকাপৰ প্ৰচাৰ আৰু পৃষ্ঠপোষকতাৰ ল’গ’ বৰ্জন কৰাৰ হুংকাৰ দিছে। ইয়াৰ ফলত বিশ্বকাপৰ পূৰ্বে পাকিস্তানৰ বাবে ডাঙৰ সমস্যাৰ সৃষ্টি হ’ব পাৰে।
‘ক্ৰিকেট পাকিস্তান’ৰ এক প্ৰতিবেদন অনুসৰি বিগত চাৰিমাহ ধৰি পাকিস্তানী খেলুৱৈয়ে মেচৰ মাচুল বা দৰমহা লাভ কৰা নাই, যাৰ বাবে খেলুৱৈসকলৰ মাজত যথেষ্ট ক্ষোভৰ সৃষ্টি হৈছে। ইয়াৰ পূৰ্বে খবৰ অনুসৰি খেলুৱৈসকলৰ দৰমহা বৃদ্ধি হ’ব বুলি দাবী কৰিছিল যদিও নতুন কেন্দ্ৰীয় চুক্তি এতিয়াও স্বাক্ষৰিত হোৱা নাই।
পাকিস্তান দলৰ এগৰাকী খেলুৱৈয়ে গোপনীয়তা বজাই ৰখাৰ চৰ্তত ‘ক্ৰিকেট পাকিস্তান’ক কয়, ‘আমি বিনামূলীয়াকৈ পাকিস্তানক প্ৰতিনিধিত্ব কৰিবলৈ সাজু, কিন্তু প্ৰশ্ন হয় যে আমি ব’ৰ্ডৰ সৈতে জড়িত লোকসকলক কিয় পৃষ্ঠপোষকতা প্ৰদান কৰিব লাগে। একেদৰে আমি প্ৰচাৰমূলক কাম-কাজ আৰু অন্যান্য অনুষ্ঠানত অংশগ্ৰহণ কৰিবলৈ অস্বীকাৰ কৰিব পাৰো। বিশ্বকাপৰ সময়ত আমি আইচিচিৰ বাণিজ্যিক প্ৰচাৰ আৰু কাৰ্যকলাপৰ সৈতে জড়িত নহ’ম।’
প্ৰতিবেদনত আৰু কোৱা হৈছে যে খেলুৱৈসকলে আয়ৰ অংশ আইচিচি আৰু পৃষ্ঠপোষকৰ পৰা দাবী জনাইছে। পাকিস্তান ক্ৰিকেট ব’ৰ্ডে আইচিচি আৰু পৃষ্ঠপোষকৰ পৰা লাভ কৰিব প্ৰায় ৯.৮ বিলিয়ন টকা।
Continue Reading
