ডিজিটেল ডেস্কঃ মহাৰাষ্ট্ৰৰ বুলধনা জিলাত এক ভয়ংকৰ পথ দুৰ্ঘটনা সংঘটিত হৈছে। দুখনকৈ যাত্ৰীবাহী বাছৰ সংঘৰ্ষৰ ফলত সংঘটিত হয় এই ভয়াৱহ পথ দুৰ্ঘটনা। হোৱা এই ভয়ংকৰ পথ দুৰ্ঘটনাত থিতাতে নিহত হৈছে ৬ গৰাকী যাত্ৰী। আনহাতে আহত হৈছে ২৫ গৰাকীকৈ যাত্ৰী।
মুম্বাইৰ নাগপুৰ ঘাইপথৰ মালকাপুৰৰ সমীপৰ ফ্লাই অভাৰত সংঘটিত হৈছে দুৰ্ঘটনাটো। এই দুৰ্ঘটনাটোৰ ভয়াৱহতা আৰু আহতসকলৰ সংকটজনক অৱস্থালৈ চাই মৃতকৰ সংখ্যা আৰু অধিক বৃদ্ধি পোৱাৰ আশংকা কৰা হৈছে। দুৰ্ঘটনাত পতিত হোৱা এখন বাছত আছিল তীৰ্থ যাত্ৰী। এই তীৰ্থযাত্ৰী কঢ়িয়াই অনা বাছখনত আছিল প্ৰায় ৪০ গৰাকী যাত্ৰী। দুৰ্ঘটনাগ্ৰস্ত বাছখনৰ নম্বৰ MH 08 9458।
তেওঁলোকে অমৰনাথ যাত্ৰা সামৰি হিংগোলীলৈ ঘূৰি অহাৰ সময়তে এই দুৰ্ঘটনাৰ সন্মুখীন হয়।
আনহাতে দুৰ্ঘটনাত পতিত হোৱা আনখন বাছ নাগপুৰৰ পৰা নাচিক অভিমুখে যাত্ৰা কৰিছিল। এই বাছখনৰ নম্বৰ আছিল MH 27 BX 4466। বাছখনত আছিল প্ৰায় ৩০ গৰাকী যাত্ৰী।
শনিবাৰে পুৱতি নিশা প্ৰায় ৩ বজাত সংঘটিত হোৱা এই ভয়ংকৰ পথ দুৰ্ঘটনাৰ খবৰ পোৱাৰ পাছতে ঘটনাস্থলীত আৰক্ষীসহ উদ্ধাৰকাৰী দল উপস্থিত হয়। তেওঁলোকে দুয়োখন বাছৰ যাত্ৰীকে উদ্ধাৰ কৰে। ঘটনাত আহত ২৫ গৰাকীৰ ভিতৰত বহু কেইজনৰে অৱস্থা সংকটজনক বুলি জানিব পৰা গৈছে। এই ঘটনাই সমগ্ৰ অঞ্চলজুৰি গভীৰ শোকৰ ছাঁ পেলাইছে।
Continue Reading
