ডিজিটেল ডেস্কঃ আমেৰিকাৰ ইতিহাসত আটাইতকৈ বিৰল প্ৰচণ্ড শীত আৰু হিমপাতে দেশখনৰ জনজীৱন বিপৰ্যস্ত কৰি তুলিছে৷ বিৰল শীতকালীন ধুমুহাই সমগ্ৰ দক্ষিণ আমেৰিকাত ভয়াৱহ পৰিস্থিতিৰ সৃষ্টি কৰিছে৷ টেক্সাছৰ পৰা ফ্লৰিডালৈকে ১৫০০ মাইলতকৈ অধিক দূৰত্বলৈকে বিপজ্জনক শীতৰ ধুমুহাৰ গ্ৰাসত পৰিছে৷ দেশখনত শীতৰ ইমান ভয়াৱহ ৰূপ কেইবাটাও প্ৰজন্মৰ লোকে দেখা পোৱা নাছিল৷
শীতৰ ধুমুহাই কেৱল দক্ষিণৰ ৰাজ্যসমূহৰ তাপমাত্ৰা হ্ৰাস কৰাই নহয়, দেশখনৰ অধিকাংশকে প্ৰচণ্ড শীতৰ কবলত পেলাইছে৷ দেশখনত এতিয়ালৈকে দহজনতকৈ অধিক লোকৰ মৃত্যু হৈছে৷ ইয়াৰ লগতে আজি টেক্সাছ, লুইছিয়ানা, আলাবামা, জৰ্জিয়া আৰু ফ্লৰিডাৰ ডেৰ লাখতকৈ অধিক ঘৰৰ বিদ্যুৎ সংযোগ ব্যাহত হৈ পৰে৷ পথৰ পৰা বৰফ আঁতৰোৱাৰ কাম চলি আছে৷ জনসাধাৰণক বৰফেৰে আবৃত পথলৈ ওলাই নাহিবলৈ পৰামৰ্শ দিয়া হৈছে৷ বতৰৰ আগলি বতৰা অনুসৰি কাইলৈও তাপমাত্ৰা শূন্যৰ তলতে থাকিব৷ প্ৰচণ্ড হিমপাত আৰু শীতৰ কাৰণে ২১০০খনতকৈ অধিক বিমানৰ উৰণ বাতিল কৰা হৈছে৷
মিছিছিপি, আলবামা, ফ্লৰিডা, জৰ্জিয়া আৰু লুইছিয়ানাকে ধৰি ১১খন ৰাজ্যত জৰুৰী অৱস্থা ঘোষণা কৰা হৈছে৷ এই ৰাজ্যসমূহত হিমপাত বন্ধ হোৱাৰ পাছতো কেইবা দিনৰ পাছতহে পৰিস্থিতি স্বাভাৱিক অৱস্থালৈ উভতি আহিব৷ উত্তৰ মেৰুৰ পৰা অহা বৰফৰ ধুমুহাৰ ফলত হাউষ্টনত ৪ ইঞ্চি, নিউ অৰ্লিয়েন্সত প্ৰায় ১০ ইঞ্চি, ফ্লৰিডাকে ধৰি আন কিছুমান অঞ্চলত ৫-১২ ইঞ্চি বৰফ পৰিছে৷
হাউষ্টনৰ মহানগৰীয় অঞ্চলত বৰফৰ ডাঠ তৰপ পৰিছে আৰু ইয়াৰ ফলত তাপমাত্ৰা মাইনাছ ২০ ডিগ্ৰী চেলছিয়াছ হৈছে৷ আনহাতে, কালি লুইছিয়ানাত হিমপাতে সৰ্বকালৰ অভিলেখৰ সৃষ্টি কৰে৷ কালি প্ৰতি ঘণ্টাত এক ইঞ্চি হিমপাত হয়৷ অৰ্লিয়েন্সত বৰফৰ ধুমুহা অব্যাহত থাকিব বুলি কোৱা হৈছে৷
Continue Reading
