ডিজিটেল ডেস্ক: বিশ্ব কাপ জয় কৰাৰ পাছতেই অষ্ট্ৰেলিয়াৰ ক্ৰিকেটাৰ মিচেল মাৰ্শ্বৰ এখন ফটোক লৈ সৃষ্টি হৈছে তীব্ৰ বিতৰ্কৰ৷
ছ’চিয়েল মিডিয়াত ধুমুহাৰ গতিত ভাইৰেল হৈ পৰা এই ফটোখনত অষ্ট্ৰেলিয়াৰ ক্ৰিকেটাৰ মিচেল মাৰ্শক দুয়োখন ভৰি বিশ্বকাপ ট্ৰফীৰ ওপৰত উঠাই জিৰণি লোৱা দেখা গৈছে। ফটোখন প্ৰথমতে অষ্ট্ৰেলিয়াৰ অধিনায়ক পেট কামিন্সে ইনষ্টাগ্ৰামত শ্বেয়াৰ কৰিছিল। তাৰ পৰা ফটোখন বনজুইৰ দৰে বিয়পি পৰে ইণ্টাৰনেটত৷
ছ’চিয়েল মিডিয়াত মিচেলৰ এই ভংগীমাক অসন্মানজনক বুলি অভিহিত কৰা হৈছে আৰু ইয়াৰ বাবে তেওঁক ট্ৰ’ল কৰা হৈছে৷
অষ্ট্ৰেলিয়াই বিশ্বকাপ ট্ৰফী কঢ়িওৱাৰ কেইঘণ্টামান পাছত ফটোখন শ্বেয়াৰ কৰা হৈছিল। ফটোখনৰ অৱস্থিতি হোটেলৰ কোঠাত দেখা গৈছে, য‘ত অষ্ট্ৰেলিয়াৰ দলটোৱে বহি আছিল আৰু ইজনে-সিজনৰ সৈতে বাৰ্তালাপ কৰি আছিল। মাৰ্শ্বে তেওঁৰ দুয়োখন ভৰি ট্ৰফীৰ ওপৰত থৈ জিৰণি লৈছিল৷
২০২৩ চনৰ ক্ৰিকেট বিশ্বকাপৰ ফাইনেলত অষ্ট্ৰেলিয়াই ভাৰতক পৰাস্ত কৰি ষষ্ঠবাৰলৈ খিতাপ দখল কৰে। খেলখন আহমেদাবাদত অনুষ্ঠিত হৈছিল, য’ত অষ্ট্ৰেলিয়াই টছত জয়ী হোৱাৰ পাছত প্ৰথমে ফিল্ডিং কৰাৰ সিদ্ধান্ত লৈছিল। ভাৰতে ২৪০ ৰাণ সংগ্ৰহ কৰিবলৈ সক্ষম হয়, বিৰাট কোহলী আৰু কে এল ৰাহুলে অৰ্ধ-শতক অৰ্জন কৰে। অৱশ্যে, অষ্ট্ৰেলিয়াৰ ট্ৰেভিছ হেডে এক উল্লেখযোগ্য ইনিংছ খেলি ১২০টা বলত ১৩৭ ৰাণ সংগ্ৰহ কৰে আৰু তেওঁৰ দলটোক বিজয়ৰ দিশে আগুৱাই লৈ যায়।
Continue Reading
