থানাৰপৰা নি কৰা এনকাউণ্টাৰ ঘোৰ অন্যায়; এইবাৰ তদন্তৰ দাবী প্ৰমিলাৰাণীৰ

গুৱাহাটী : ‘থানাৰ পৰা লৈ গৈ দুজন যুৱকক নিশংসভাৱে হত্যা কৰাৰ কাৰ্যক গৰিহণা দিছো, ই এক ঘোৰ অন্যায়!’ - বুলি মন্তব্য কৰে প্ৰাক্তন মন্ত্ৰী তথা বিপিএফৰ জ্যেষ্ঠ নেত্ৰী প্ৰমিলাৰাণী ব্ৰহ্মই৷ তেওঁ লগতে কয় যে, ‘আমি প্ৰথম যেতিয়া আন্দোলন কৰিছিলো৷ তেতিয়াও চৰকাৰে এইধৰণৰ কাম কৰিছিল৷আকৌ তেনেধৰণৰ হত্যাকাণ্ড চৰকাৰে আৰম্ভ কৰিছে৷’ আমাৰ সাংবাদিকৰ সৈতে হোৱা বাৰ্তালাপত তেওঁ কয় যে, ‘যদি সংগঠনৰ ল’ৰা হয়, তেতিয়াহ’লে বেলেগ কথা৷ কিন্তু কোনোধৰণৰ প্ৰমাণ নোহোৱাকৈ কৰা এই হত্যাকাণ্ডক তীব্ৰ ভাষাৰে গৰিহণা দিছো৷’ মৃত্যু হোৱাৰ পূৰ্বে যুৱকদুজনৰ পৰা কোনোধৰণৰ বিবৃতি নোলোৱাৰ বাবে ক্ষোভ প্ৰকাশ কৰে প্ৰাক্তন মন্ত্ৰীগৰাকীয়ে৷

উল্লেখ্য যে, বিগত ১৭ ছেপ্টেম্বৰৰ নিশা কোকৰাঝাৰ আৰক্ষীৰে হোৱা সংঘৰ্ষত নিহত হৈছিল দুগৰাকী ইউ এল বি সদস্য বুলি চিনাক্ত কৰা দুজন যুৱক৷ যুৱক দুজন ক্ৰমে টিপকাইৰ জনক ব্ৰহ্ম আৰু পাতগাঁৱৰ জৌংসাৰ মুছাহাৰী বুলি জানিবলৈ পৰা গৈছিল। ১৮ ছেপ্টেম্বৰত এই সন্দৰ্ভত কোকৰঝাৰৰ আৰক্ষী অধীক্ষক সুৰজিৎ সিং পানেছাৰে সংবাদ মেলযোগে সংঘৰ্ষৰ সবিশেষ বৰ্ণনা কৰিছিল। কিন্তু আৰক্ষীৰ দাবীৰ বিপৰীতে জৌংসাৰ মুছাহাৰীৰ পৰিয়ালৰ লোকে আগবঢ়ায় অন্য ভাষ্য। কোলাত পোন্ধৰ দিনীয়া সন্তান লৈ তেওঁৰ পত্নীয়ে কান্দি কান্দি সাংবাদিকৰ সন্মুখত কয় যে, ‘জৌংসাৰ ইউ এল বি সদস্য নহয় ।’ আৰু তাৰ পাছতেই উত্তপ্ত হৈ পৰে বিটিচি৷

আমাৰ সাংবাদিকৰে প্ৰমিলা ৰাণী বহ্মৰ লগত হোৱা কথোপকথনত থানাৰ পৰা তেনেকৈ লৈ গৈ হত্যা কৰা কাণ্ডক অন্যায় বুলি নকৈ কি বুলি ক'ব বুলিব মন্তব্য কৰে প্ৰমিলাই৷ এই বিষয়ত তদন্ত কৰিবলৈও চৰকাৰক অনুৰোধ জনায় তেওঁ৷ ব্ৰহ্মৰ মতে, মৃত যুৱক দুজন সেইদিনাখন দুৰ্ঘটনাত পতিত হৈছিল৷ দুৰ্ঘটনাৰ ফলত জনক ব্ৰহ্ম আৰু জৌংসাৰ মুছাহাৰী বেয়াকৈ আঘাটপাপ্ত হৈছিল৷ যাৰফলত আফলাগাঁৱৰ ৰাইজে আৰক্ষী চকীত অৱগত কৰিছিল৷ আৰু আৰক্ষীয়ে তাৰপাছত যুৱক দুজনক ভূৱা এনকাউণ্টাৰ কৰে৷ এই কথা আফলাগাঁৱৰ ৰাইজে ভুলতো কল্পনা কৰিব পৰা নাই বুলিও মন্তব্য কৰে তেওঁ৷ এই ঘটনাটোক ব্ৰহ্মই ঘোৰ অন্যায় বুলি কোৱাৰ লগতে তীব্ৰ ভাষাৰে গৰিহণাও দিয়ে৷ আৰক্ষী বিষয়াজনৰ ওপৰত উচিত তদন্তও ল'বলৈ চৰকাৰক অনুৰোধ জনায় প্ৰাক্তন মন্ত্ৰীগৰাকীয়ে৷ আনহাতে বিটিচিত নতুন স-শস্ত্ৰ সংগঠন গঠন কৰাক লৈ অৱগত নহয় প্ৰাক্তন মন্ত্ৰী প্ৰমিলা ৰাণী ব্ৰহ্ম৷ টেলিভিছনৰ জৰিয়তে হে এই সংগঠনৰ বিষয়ে জানিবলৈ পাইছে বুলিও মন্তব্য কৰে প্ৰমিলাই৷