টি২০ বিশ্বকাপত নতুন অভিলেখ গঢ়িলে বিৰাট কোহলীয়ে, পাছ পেলালে শ্ৰীলংকাৰ এগৰাকী প্ৰাক্তন তাৰকাক

ডিজিটেল ডেস্কঃ বাংলাদেশৰ বিৰুদ্ধে অনবদ্য ইনিংছটো খেলি বিৰাট কোহলীয়ে গঢ়িলে আন এটা অভিলেখ। ৬৪ ৰাণৰ ইনিংছটো খেলি বিৰাটে টি২০ বিশ্বকাপৰ ইতিহাসত সৰ্বাধিক ৰাণ সংগ্ৰহকাৰী বেটাৰ হিচাপে পৰিগণিত হ’ল।

ইনিংছটোত ১৬ ৰাণ কৰোতেই তেওঁ এই অভিলেখৰ গৰাকী হয়। এইক্ষেত্ৰত তেওঁ শ্ৰীলংকাৰ কিংম্বদন্তি খেলুৱৈ মাহেলা জয়াবৰ্ধনৰ অভিলেখ ভংগ কৰে। জয়াবৰ্ধনে টি২০ বিশ্বকাপৰ ইতিহাসত ৩১টা ইনিংছ খেলি মুঠ ১০১৬ ৰাণ সংগ্ৰহ কৰিছিল।

আনহাতে, কোহলীয়ে ২৫ টা ইনিংছ খেলিয়েই এই অভিলেখৰ গৰাকী হয়। কোহলীৰ এই সফলতাত বিচিচিআইয়ে অভিনন্দন জনাইছে।

উল্লেখ্য যে টি২০ বিশ্বকাপত কোহলীয়ে সদায়েই সুন্দৰ প্ৰদৰ্শন আগবঢ়াই আহিছে। ২০১৪ চনৰ বিশ্বকাপত তেওঁ ৩১৯ ৰাণ সংগ্ৰহ কৰিছিল। ২০১৬ চনতো ২৭৩ ৰাণ সংগ্ৰহেৰে তেওঁ শীৰ্ষ বেটছমেনৰ তালিকাত আছিল।

এইবাৰৰ বিশ্বকাপতো তেওঁ দুৰ্দান্ত ফৰ্মত আছে। পাকিস্তানৰ বিৰুদ্ধে স্মৰণীয় ৮২ আৰু নেদাৰলেণ্ডৰ বিৰুদ্ধে ৬২ ৰাণ কৰাৰ পাছত বাংলাদেশৰ বিৰুদ্ধেও ৬৪ ৰাণৰ দুৰ্দান্ত ইনিংছ খেলিলে।