ডিজিটেল ডেস্কঃ তিনি ঘণ্টা সময় বিয়েৰ খাবলৈ নাপালেও বাচি থাকিব পাৰি। এইদৰে ভাষ্য আগবঢ়ালে ফিফাৰ সভাপতি জিয়ান্নি ইনফান্টিনো।
কাটাৰ বিশ্বকাপত মদ বা বিয়েৰ নিষিদ্ধ কৰা হৈছে। ষ্টেডিয়ামসমূহত বিয়েৰৰ দোকান খোলাত অনুমতি প্ৰদান কৰা নাই কাটাৰৰ চৰকাৰে। তাকে লৈ শেহতীয়াকৈ ফুটবলপ্ৰেমীসকলৰ মাজত তীব্ৰ বিতৰ্কৰ সৃষ্টি হৈছে।
এই লৈ শনিবাৰে কাটাৰৰ ৰাজধানী দোহাত সাংবাদিক মেল সম্বোধন কৰে ফিফাৰ সভাপতিগৰাকীয়ে। তেওঁ তাত কয় যে ষ্টেডিয়ামত বিয়েৰ নিষিদ্ধ হোৱাটো একো সমস্যা নহয়। তিনি ঘণ্টা বিয়েৰ নাখালেও বাচি থাকিব পাৰি।
এইক্ষেত্ৰত তেওঁ ফ্ৰান্স, স্পেইন, স্কটলেণ্ডৰ ষ্টেডিয়ামসমূহৰ কথা উল্লেখ কৰে। উল্লেখ্য যে এইসমূহ দেশৰ ষ্টেডিয়ামসমূহতো মদ বিক্ৰী নিষিদ্ধ।
আনহাতে, কাটাৰৰ চৰকাৰে হঠাৎ মদ নিষিদ্ধ কৰাৰ নিৰ্দেশ দিয়াৰ লগে লগে ফিফাক স্পনছ’ৰ কৰা এটা বিয়েৰ কোম্পানীও ক্ষোভিত হৈ পৰিছে। মদ নিষিদ্ধ হোৱাৰ ফলত কোম্পানীটোৰ বৃহৎ আৰ্থিক লোকচান হোৱাৰ সম্ভাৱনা আছে। জানিব পৰামতে, ফিফাৰ স’তে কোম্পানীটোৰ চুক্তিও বাতিল কৰিব পাৰে।
Continue Reading
