ডিজিটেল ডেস্কঃ পশ্চিমবংগৰ ৰাজনৈতিক মহলত ধুমুহা। তৃণমূল কংগ্ৰেছ নেতাৰ এগৰাকী নেতাৰ পুত্ৰৰ জন্মদিনৰ পাৰ্টিত এগৰাকী কিশোৰীক দলবদ্ধ ধৰ্ষণ কৰি হত্যা কৰাৰ গুৰুতৰ অভিযোগ উত্থাপন হৈছে। এই ঘটনাক কেন্দ্ৰ কৰি সৃষ্টি হৈছে তীব্ৰ চাঞ্চল্যৰ। পশ্চিমবংগৰ নদীয়াৰ এগৰাকী তৃণমূল কংগ্ৰেছৰ পঞ্চায়ত সদস্যৰ পুত্ৰৰ জন্মদিনৰ পাৰ্টিত এই জঘন্য ঘটনা সংঘটিত হোৱা বুলি জানিব পৰা গৈছে।
দলবদ্ধ ধৰ্ষণকাণ্ডৰ পাছত কৰুণ মৃত্যু হোৱা ১৪ বছৰীয়া কিশোৰীগৰাকীক পৰৱৰ্তী সময়ত পৰিয়ালৰ কোনোধৰণৰ অনুমতি নোলোৱাকৈ অন্তিম সৎকাৰ কৰা হয় বুলিও কিশোৰীগৰাকীৰ মাতৃয়ে উল্লেখ কৰে। কিশোৰীগৰাকী নৱম শ্ৰেণীত পঢ়ি আছিল। ভুক্তভোগীৰ পৰিয়ালে অপৰাধ সংঘটিত কৰাৰ অভিযোগ উত্থাপন কৰাৰ পিছত আৰক্ষীয়ে তৃণমূল কংগ্ৰেছৰ পঞ্চায়তৰ এজন সদস্যক গ্ৰেপ্তাৰ কৰিছে। অভিযুক্তজনক ব্ৰজাগোপাল ওৰফে চোহেল গয়ালী বুলি চিনাক্ত কৰা হৈছে। তেওঁক প্ৰথমে আটক কৰা হৈছিল আৰু তাৰ পিছত যোৱা নিশা গ্ৰেপ্তাৰ কৰা হৈছিল।
তেওঁক সোমবাৰে ৰাণাঘাট আদালতত হাজিৰ কৰোৱা হয়। পশ্চিমবংগত বিধানসভা নিৰ্বাচনৰ পাছৰে পৰা ৰাজ্যখনৰ আইন-শৃংখলাজনিত পৰিস্থিতিৰ ব্যাপক অৱনতি ঘটিছে বুলি বিজেপি আৰু বিৰোধী দল সমূহে প্ৰতিবাদ সাব্যস্ত কৰি আহিছে। ৰাণাঘাট আৰক্ষী জিলাৰ অতিৰিক্ত এছপি ৰূপংকৰ সেনগুপ্তাই কয়, "যোৱা নিশা হংশখালী পিএছত এটা অভিযোগ পাইছিলো৷ সেই অনুসৰি, হংশখালী পিএছ গোচৰ নং ৩২৭/২২ ডিটি ১০.০৪.২২ ইউ/এছ ৩৭৬(৩)/৩০২/২০১/৩৪ আইপিচি আৰু ৬ পস্কো আইনৰ অধীনত গোচৰ ৰুজু কৰা হৈছে৷ অনুসন্ধানৰ সময়ত এজন লোকক জেৰাৰ বাবে গ্ৰেপ্তাৰ কৰা হৈছে। সমগ্ৰ ঘটনাৰ তদন্ত চলি আছে।"
Continue Reading
