ডিজিটেল ডেস্কঃ চীনৰ ৰাষ্ট্ৰপতি ঝি জিনপিঙে শুকুৰবাৰে দেশ খনৰ ৰাষ্ট্ৰপ্ৰধান হিচাপে তৃতীয় কাৰ্যকালৰ বাবে পুনৰ দায়িত্ব গ্ৰহণ কৰিবলৈ সাজু হৈছে। শাসনাধিষ্ঠিত কমিউনিষ্ট পাৰ্টিৰ নেতৃত্ব দিয়া জিনপিঙে ১৯৪৯ চনৰে পৰা দেশ খনত কমিউনিষ্ট শাসন চলাৰ পিছত চীনৰ আটাইতকৈ দীঘলীয়া সময়ৰ বাবে দায়িত্বতত থকা ৰাষ্ট্ৰপতি হিচাবে পৰিগণিত হৈছে।
দেশখনৰ আইনসভাৰ ৩,০০০ সদস্যই শুক্ৰবাৰে তেওঁক আনুষ্ঠানিকভাৱে ৰাষ্ট্ৰপতি হিচাপে আৰু পাঁচ বছৰৰ বাবে দায়িত্ব অৰ্পন কৰিব। বাৰ্ষিক বৈঠকত ঝিক কেন্দ্ৰীয় সামৰিক আয়োগৰ অধ্যক্ষ হিচাপে পুনৰ নিযুক্তি দিব বুলি আশা কৰা হৈছে। ফলত ঝি বিশ্বৰ সৰ্ববৃহৎ সশস্ত্ৰ বাহিনীৰ প্ৰধান হিচাপে পৰিগণিত হ’ব। তেওঁ ইতিমধ্যে পিপলছ লিবাৰেচন আৰ্মীৰ মুৰব্বী পদত অধিষ্ঠিত হৈছে। ৬৯ বছৰীয়া ঝি জিনপিঙে আজি সহজে নেচনেল পিপলছ কংগ্ৰেছৰ সমৰ্থন লাভ কৰাৰ সম্ভাৱনা আছে।
উল্লেখ্য জিনপিঙৰ পূৰ্বসূৰী জিয়াং জেমিন আৰু হু জিনতাওয়ে ১০ বছৰ কাৰ্যকালৰ পিছত ক্ষমতা ত্যাগ কৰিছিল। জিনপিঙে সেই নিয়ম সলনি কৰিছিল। ২০১৮ চনত কৰা চীনৰ সাংবিধানিক সংস্কাৰৰ জড়িয়তে জিনপিঙে ৰাষ্ট্ৰপতিৰ কাৰ্যকাল বৃদ্ধি কৰিছিল। চাউথ চাইনা মৰ্ণিং পোষ্টৰ মতে জিনপিঙৰ বাবে তৃতীয় কাৰ্যকাল প্ৰত্যাহ্বানপূৰ্ণ হ’ব। কাৰণ দেশ খনক অৰ্থনৈতিক বিকাশৰ পথত আগুৱাই নিবলৈ তেওঁ বহু কষ্ট কৰিব লাগিব।
Continue Reading
