ডিজিটেল ডেস্কঃ কিছুদিন পূৰ্বে টুইটাৰে হাজাৰ হাজাৰ কৰ্মচাৰীক কামৰ পৰা অব্যাহতি দিয়াৰ পিছত এইবাৰ এমাজনেও ১৮০০০ কৰ্মচাৰীক কামৰ পৰা অব্যাহতি দিয়াৰ সিদ্ধান্তৰ কথা ঘোষণা কৰিছে৷ এমাজনৰ মুখ্য কাৰ্যবাহী বিষয়া এণ্ডি জেছিয়ে কয় যে অতি শীঘ্ৰে কোম্পানীটোৰ পৰা ১৮০০০ কৰ্মচাৰীক অৱসৰ দিয়া হ’ব৷
ই-কমাৰ্চ কোম্পানীটোৰ সৈতে লাখ লাখ লোক নিয়োজিত হৈ আছে৷ এমাজনৰ এনে সিদ্ধান্তই মূলতঃ ষ্ট'ৰ আৰু পিএক্সটি (পিপল, এক্সপিৰিয়েঞ্চ, এণ্ড টেকন'লজী,এইচআৰ) ৰ কৰ্মীসকলক ঘতিগ্ৰস্ত কৰিব৷ কোম্পানীৰ মুখ্য কাৰ্যবাহী বিষয়া এণ্ডি জেছিয়ে এটা ব্লগ পোষ্টত কয় যে এমাজনে সাধাৰণতে এনে সিদ্ধান্তবোৰ আভ্যন্তৰীণভাৱে জনায়, যদিও কোম্পানীটোৱে এতিয়া এয়া ৰাজহুৱা মঞ্চত উপস্থাপন কৰিছে৷ কিয়নো কৰ্মচাৰীসকলে "এই তথ্য লিক কৰিছে।" ছাটাই প্ৰক্ৰিয়াটো ১৮ জানুৱাৰীৰ পৰা আৰম্ভ হ'ব বুলিও চিইঅ' জেছিয়ে উল্লেখ কৰিছে৷
পোষ্টটোত উল্লেখ কৰা হৈছে যে কোম্পানীটোৱে অব্যাহতি দিয়া কৰ্মচাৰীসকলক উপযুক্ত ক্ষতিপূৰণ আদায় দিহে বিদায় দিব৷ উল্লেখ্য ২০২২ চনৰ নৱেম্বৰত কোম্পানীটোৱে প্ৰায় ১০,০০০ কৰ্মচাৰীক ছাটাই কৰিছিল। যোৱা বছৰৰ শেষৰ ফালে ই-কমাৰ্চ কোম্পানীটোৱে আনকি এই বছৰত নতুন নিয়োগো স্থগিত ৰাখিছে। বৰ্ধিত মুদ্ৰাস্ফীতি আৰু অৱনমিত অৰ্থনীতিৰ বাবেই ব্যয় হ্ৰাস কৰিবলৈ এনে কঠোৰ ব্যৱস্থা গ্ৰহণ কৰা হৈছে৷
Continue Reading
