উদ্ধৱ থাকৰেৰ সংকটমোচন কৰিবলৈ এইবাৰ ফিল্ডত পত্নী ৰশ্মি থাকৰে

ডিজিটেল ডেস্ক: মহাৰাষ্ট্ৰৰ ৰাজনৈতিক সংকটত নিবদ্ধ হৈ ৰৈছে দেশবাসীৰ দৃষ্টি৷ প্ৰতি মুহূৰ্তত সলনি হৈছে প্ৰেক্ষাপট৷ উদ্ধৱ থাকৰেৰ বিৰোধিতা কৰি একনাথ সিন্দেৰ নেতৃত্বত গুৱাহাটীৰ ৰেডিশ্বন ব্লুত বাহিৰ পাতিছে বিসম্বাদী বিধায়কে৷ আৰু তাৰ মাজতে প্ৰেক্ষাপটত উদ্ধৱ-পত্নী ৰশ্মি থাকৰে৷

উদ্ধৱ থাকৰেৰ পত্নী ৰশ্মি থাকৰেয়ে যোগ দিছে শিৱসেনাৰ বৈঠকত৷ বৈঠকত অংশ লৈয়ে বিসম্বাদীসকলৰ পত্নীসকলৰ সৈতে যোগাযোগ কৰি তেওঁলোকক ঘূৰি আহিবলৈ সৈমান কৰাবলৈ প্ৰয়াস কৰিব বুলি মন্তব্য কৰে৷

কালি মুখ্যমন্ত্ৰী উদ্ধৱ ঠাকৰেয়ে সেনাৰ নেতাসকলৰ সৈতে এখন ৰাষ্ট্ৰীয় কাৰ্যনিৰ্বাহক বৈঠকৰ আহ্বান কৰিছিল৷ আন যিকোনো ৰাজনৈতিক সংগঠন বা গোটক শিৱসেনা আৰু দলটোৰ প্ৰতিষ্ঠাপক বালাচাহেব থাকৰেৰ নাম ব্যৱহাৰ কৰাত বাধা দিবলৈ নিৰ্বাচন আয়োগক আৱেদন জনাইছিল।

মহাৰাষ্ট্ৰ বিধানসভাৰ মুঠ শক্তি হৈছে ২৮৭ আৰু সংখ্যাগৰিষ্ঠতা, আস্থা ভোটৰ ক্ষেত্ৰত ১৪৪৷  শিৱসেনা, এনচিপি আৰু কংগ্ৰেছৰ শাসকীয় মিত্ৰজোঁটৰ ১৬৯খন আসন আছে। যদি সিন্দেৰ নেতৃত্বত বিধায়কসকলে পদত্যাগ কৰে, তেন্তে মহা বিকাশ আঘাদীয়ে (এমভিএ) সংখ্যাগৰিষ্ঠতা হেৰুৱাব আৰু তেতিয়াই উদ্ধৱ ঠাকৰে নেতৃত্বাধীন চৰকাৰৰ পতন নিশ্চিত হ’ব৷