ডিজিটেল ডেস্কঃ ব্ৰহ্মাস্ত্ৰ ছবিখনৰ প্ৰচাৰৰ বাবে মঙলবাৰে উজ্জয়িনীত উপস্থিত হয় ৰণবীৰ কাপুৰ, আলিয়া ভাট আৰু পৰিচালক অয়ন মুখাৰ্জী। অৱশ্যে মহাকালক দৰ্শন কৰাৰ পূৰ্বেই তেওঁলোক প্ৰচণ্ড বিৰোধিতাৰ সন্মুখীন হ’বলগীয়া হয়। মহাকালক দৰ্শন কৰিবলৈ মন্দিৰত উপস্থিত হোৱাৰ আগতেই শতাধিক বজৰং দলৰ কৰ্মী মন্দিৰৰ দুৱাৰত উপস্থিত হয়।
শ্ৰী ৰামৰ ধ্বনি দি বজৰং দলৰ কৰ্মীসকলে হুলস্থুল আৰম্ভ কৰে। গভীৰ নিশা মহাকাললৈ আহিছিল অয়ন মুখাৰ্জীসহ ৰণবীৰ, আলিয়া। বাবাক দৰ্শন কৰি ছবিখনৰ সফলতাৰ বাবে প্ৰাৰ্থনা কৰিলেহেঁতেন তেওঁলোকে। অয়ন মুখাৰ্জীয়ে কয় যে ছবিখন মুক্তিৰ পূৰ্বে মহাকালক দৰ্শন কৰাৰ মোৰ বহুত ইচ্ছা আছিল।
উল্লেখ্য যে আৰক্ষীয়ে বজৰং দলৰ কৰ্মীসকলক ৰোধ কৰিবলৈ চেষ্টা কৰোতে তেওঁলোকে আৰক্ষীৰ সৈতে কাজিয়াত লিপ্ত হৈছিল। ক্ৰমবৰ্ধমান প্ৰতিবাদ দেখি আৰক্ষীয়ে ছবিখনৰ ষ্টাৰকাষ্টক নিৰাপদে উভতাই লৈ যায়। বজৰং দলে অভিযোগ কৰি কয় যে ব্ৰহ্মাস্ত্ৰত ৰণবীৰ কাপুৰে গৌমাতাৰ বিষয়ে ভুল মন্তব্য কৰিছিল, যাৰ বাবে কৰ্মীসকলে প্ৰতিবাদ কৰিছে।
এই বৰ্ষৰ আটাইতকৈ ডাঙৰ ছবিখন হ’ল অয়ন মুখাৰ্জীৰ ‘ব্ৰহ্মাস্ত্ৰ’। অয়ন মুখাৰ্জীয়ে যোৱা ৯ বছৰ ধৰি এই ছবিখনৰ কাম কৰি আছিল। ৯ ছেপ্টেম্বৰত মুক্তি পাব ছবিখনে। ছবিখনৰ বাজেট ৩০০-৩৫০ কোটি টকা বুলি কোৱা হৈছে।
Continue Reading
