উজনি অসমত বানৰ পাছত নতুন সংকট: স্বাস্থ্যজনিত জৰুৰীকালীন অৱস্থা

গুৱাহাটী, ৩ আগষ্ট: উজনি অসমৰ শিৱসাগৰ, চৰাইদেউ, যোৰহাট আৰু গোলাঘাট জিলাসমূহত বানপানীৰ তাৎক্ষণিক ভাবুকি হ্ৰাস পালেও, বিধ্বংসী বানৰ পাছত এক জটিল জনস্বাস্থ্যজনিত জৰুৰীকালীন অৱস্থাৰ সৃষ্টি হৈছে। বানৰ পানী শুকোৱাৰ লগে লগে ঠায়ে ঠায়ে জমা হোৱা ডাঠ বোকা, পলস আৰু আৱৰ্জনাই বিভিন্ন ৰোগৰ উৎস সৃষ্টি কৰি বানাক্ৰান্ত লোকসকলৰ দুৰ্ভোগ আৰু বৃদ্ধি কৰিছে।

কইদিন ধৰি পানীৰ মাজত জীৱন অতিবাহিত কৰা বাসিন্দাসকলে এতিয়া স্বাস্থ্যজনিত সমস্যাৰ বৰ্দ্ধিত হাৰৰ কথা জনাইছে। ছালৰ সংক্ৰমণ, জ্বৰ, শ্বাস-প্ৰশ্বাসজনিত সমস্যা আৰু ডায়েৰিয়া এতিয়া এক সাধাৰণ ঘটনা হৈ পৰিছে। শাৰীৰিক কষ্টৰ উপৰিও, দীৰ্ঘদিন ধৰি চলি থকা এই দুৰ্ভোগে বানাক্ৰান্তসকলৰ মাজত যথেষ্ট মানসিক চাপো সৃষ্টি কৰিছে।

বানাক্ৰান্ত অঞ্চলৰ এগৰাকী বাসিন্দা ৰঞ্জিতা বুঢ়াগোঁহায়ে বৰ্তমানৰ পৰিস্থিতি বৰ্ণনা কৰি কয়, “মোৰ মুখ আৰু ভৰিত সৰু সৰু ফোঁহা ওলাইছে। খজুৱতি ইমান বেছি হৈছে যে সহ্য কৰিব নোৱাৰা অৱস্থা হৈছে। চাৰিওফালে এটা নিৰন্তৰ দুৰ্গন্ধও বিয়পি আছে।” আন এগৰৰাকী মহিলাই জনাইছে যে বানপানী আৰম্ভ হোৱাৰ পৰা তেওঁ জ্বৰত ভুগি আছে। তেওঁ কয়, "মোৰ জ্বৰ হৈছে আৰু পেৰাচিটামল খোৱাৰ পাছতো ইয়াৰ উপশম হোৱা নাই। বানপানী আৰম্ভ হোৱাৰ পৰা মই এই অৱস্থাত আছো।"

উজনি অসমৰ বানাক্ৰান্ত পৰিয়ালসমূহে সাহায্য শিবিৰত আশ্ৰয় লৈ আছে যদিও তেওঁলোক এতিয়াও ৰোগৰ বিয়পি পৰাৰ নিৰন্তৰ ভাবুকিৰ মাজত আছে। সংশ্লিষ্ট কৰ্তৃপক্ষই এই নতুন সংকট মোকাবিলা কৰিবলৈ তাৎক্ষণিকভাৱে পদক্ষেপ লোৱাৰ প্ৰয়োজন আছে বুলি স্থানীয় ৰাইজে আহ্বান জনাইছে।